“Netanyahu humbi bastin te Trump”/ Komentatori izraelit: Çfarë po ndodh në Liban, haptazi e paligjshme

Komentatori politik izraelit Ori Goldberg e ka përshkruar sulmin ushtarak të paprecedentë të Izraelit ndaj Libanit si “një shfaqje piroteknike e destinuar të demonstrojë efektivitetin e Izraelit, ndërsa në fund tregon dëshpërimin e tij”.

“I vetmi entitet që mund ta ndalë këtë është komuniteti ndërkombëtar, i cili duhet të mbrojë të drejtat sovrane të Libanit, të cilat janë shkelur për dekada, por tani pothuajse nuk ekzistojnë më”, tha Goldberg për “Al Jazeera”.

Ai tha se kryeministri izraelit Netanyahu është ekspozuar si “një barrë” për Uashingtonin për shkak të luftës SHBA-Izrael kundër Iranit, dhe se udhëheqësi i Izraelit po “përpiqet dëshpërimisht të tregojë se kontrollon të paktën një pjesë të lojës”.

“Netanyahu vuri gjithçka bast te Trump; ai humbi. Mendoi se mund ta mbante Trumpin nën kontroll të ngushtë. E prishi këtë. Kështu që tani ajo që i ka mbetur është Libani, i cili ka qenë terreni i preferuar i Izraelit për sa i përket shkeljes së sovranitetit dhe agresionit në përgjithësi”, tha Goldberg.

“Në fund të fundit, tani gjithçka varet nga komuniteti ndërkombëtar nëse do të ndërhyjë.”

LEXO EDHE: Irani bllokon Ngushticën e Hormuzit, Trump: Lufta Izrael-Hezbollah nuk lidhet me armëpushimin

Të paktën 112 persona janë vrarë dhe mbi 700 të tjerë janë plagosur nga sulmet e Izraelit në të gjithë Libanin sot, njoftoi Ministria e Shëndetësisë e Libanit, teksa operacionet e shpëtim-kërkimit vazhdojnë ende, raporton Al Jazeera.