Ngërç në Kuvend, dështon thirrja për ekspertët e pavarur të KLSH-së, rishpallet gara

Procesi për përzgjedhjen e ekspertëve të pavarur që do të auditojnë llogaritë financiare të Kontrollit të Lartë të Shtetit (KLSH) për vitet 2024-2025 ka mbetur në vendnumëro për shkak të mungesës së kandidatëve. Nënkomisioni Parlamentar për Auditimin e Sektorit Publik, i mbledhur këtë të mërkurë, ka vendosur rishpalljen e procedurës, pasi raundi i parë dështoi të tërhiqte numrin e kërkuar të profesionistëve sipas ligjit.

Mbledhja, e cila u drejtua nga kryetari i nënkomisionit, Igli Cara, u zhvillua në prani të përfaqësuesve të vetë KLSH-së dhe Institutit Kombëtar Demokratik (NDI).

Gara me vetëm një kandidat

Gjatë raportimit për fazën aktuale të procedurës, e cila ishte hapur zyrtarisht në janar të vitit 2026, Cara informoi deputetët se deri në përfundim të afatit zyrtar ishte paraqitur vetëm një aplikim.

Sipas përcaktimeve ligjore në fuqi, për të garantuar një proces konkurrues dhe transparent, kërkohet pjesëmarrja e të paktën dy ose më shumë kandidatëve. Përballë këtij ngërçi procedural, anëtarët e nënkomisionit miratuan unanimisht projektvendimin për rishpalljen e thirrjes publike për grupin e audituesve të pavarur.

Shtyhet shqyrtimi i dosjeve të 2025-ës

Një tjetër pikë e rëndësishme e rendit të ditës ishte edhe analiza dhe përzgjedhja e disa prej auditimeve voluminoze që KLSH ka kryer gjatë vitit 2025. Qëllimi i këtij procesi është përzgjedhja e dosjeve më me rëndësi për t’iu nënshtruar një shqyrtimi të detajuar parlamentar.

Megjithatë, për shkak të sasisë së madhe të materialeve të depozituara nga institucioni i auditimit, deputetja e maxhorancës, Antoneta Dhima, kërkoi më shumë kohë në dispozicion për t’u njohur me dokumentacionin. Me dakordësinë e anëtarëve, nënkomisioni vendosi që ky diskutim të shtyhet për mbledhjen e radhës, kur deputetët të kenë përfunduar leximin e plotë të raporteve.

/rtsh.al/