Ngjarje e rëndë në Vlorë, humb jetën 63-vjeçari pas një konflikti fizik, plagoset djali i tij
Një konflikt me pasoja tragjike është shënuar ditën e sotme në qytetin e Vlorës, ku një përplasje fizike mes disa personave ka përfunduar me një viktimë dhe një të plagosur. Ngjarja e rëndë ka ndodhur në lagjen “Pavarësia”, në afërsi të rrugës “Çipaj”. Lajmi bëhet i ditur nga gazetarja e RTSH- 24 në Vlorë.
Sipas informacioneve nga vendngjarja, tre persona u përfshinë fillimisht në një sherr fizik, rrethanat dhe motivet e të cilit mbeten ende të paqarta. Si pasojë e përplasjes së dhunshme, ka mbetur i plagosur rëndë shtetasi Ismail Aliaj, 63 vjeç.
Ai është transportuar me urgjencë drejt Spitalit Rajonal të Vlorës me anë të një autoambulance. Fatkeqësisht, burimet mjekësore konfirmuan se 63-vjeçari kishte marrë goditje të forta në pjesën e fytyrës dhe të grykës.
Për shkak të dëmtimeve kritike, ai nuk ka mundur t’u mbijetojë plagëve, duke ndërruar jetë në ambientet e spitalit.
Në këtë incident ka qenë i pranishëm dhe është përfshirë edhe djali i viktimës. Bëhet me dije se ai ka marrë lëndime të lehta dhe aktualisht ndodhet nën kujdesin e mjekëve, jashtë rrezikut për jetën.
Reagimi i autoriteteve dhe kërkimi i autorit
Menjëherë pas aktit të rëndë, autori i dyshuar është larguar me shpejtësi nga vendi i ngjarjes, duke marrë drejtimin për nga autostrada në përpjekje për të humbur gjurmët.
Policia e Vlorës është vënë menjëherë në lëvizje. Në terren janë angazhuar forca të shumta policore, të mbështetura nga efektivët e Forcës së Posaçme “Shqiponja”. Forcat e rendit kanë ngritur pika kontrolli dhe po krehin intensivisht zonën dhe akset rrugore lidhëse për të bërë të mundur lokalizimin dhe prangosjen e autorit të dyshuar.
Ndërkohë, një grup i posaçëm hetimor ka mbërritur në vendin ku nisi konflikti dhe po mbledh provat materiale, si dhe dëshmitë e personave që mund të kenë parë ngjarjen.
/rtsh.al/