Nis fushata e kontrollit inteligjent të mjeteve në akset kombëtare

TIRANË, 24 shkurt /ATSH/ Drejtoria e Përgjithshme e Shërbimeve të Transportit Rrugor (DPSHTRR), në bashkëpunim me Policinë Rrugore dhe Taskforcën e Transportit Rrugor, ka nisur fushatën e kontrollit inteligjent të mjeteve në qarkullim, në kuadër të forcimit të kontrollit rrugor dhe rritjes së sigurisë në rrugë.

Fushata ka nisur në aksin Tiranë-Milot dhe do të vijojë në ditët në vijim edhe në akset kryesore kombëtare të vendit.

Sipas njoftimit zyrtar, kjo nismë synon rritjen e sigurisë rrugore, evidentimin e mjeteve me mangësi ligjore, garantimin e kryerjes së rregullt të kontrollit teknik, si dhe forcimin e ndërgjegjësimit të drejtuesve të mjeteve mbi detyrimet që rrjedhin nga legjislacioni në fuqi.

Fushata mbështetet në përdorimin e metodave dhe teknologjive inteligjente të monitorimit, duke synuar modernizimin e proceseve të kontrollit dhe rritjen e efikasitetit në administrimin e transportit rrugor.

DPSHTRR thekson se ky bashkëpunim ndërinstitucional përfaqëson një hap të rëndësishëm drejt përmirësimit të standardeve të sigurisë dhe forcimit të zbatimit të ligjit në sektorin e transportit rrugor.

/gj.m/a.f/r.e/