Paketa 250 milionë/ Qeveria subvencionon transportin publik, 50 lekë për litër kompensim për naftën, procedurat dhe dokumentet që duhen dorëzuar

Në një lëvizje për të stabilizuar çmimet e biletave dhe për të mbështetur sektorin e transportit publik përballë luhatjeve në tregun e karburanteve, Këshilli i Ministrave ka miratuar paketën e kompensimit për shoqëritë e linjave qytetëse, rrethqytetëse dhe ndërqytetëse. Vendimi parashikon një mbështetje financiare prej 50 lekësh për çdo litër karburanti të konsumuar gjatë pranverës së këtij viti.

Fondi total i akorduar kap vlerën e 250 milionë lekëve, i cili do të ndahet mes buxhetit të shtetit (fondi rezervë) dhe Bashkisë Tiranë, për linjat që operojnë brenda kryeqytetit.

Kush përfiton dhe sa është masa e kompensimit?

Kompensimi aplikohet për një periudhë tremujore: mars, prill dhe maj 2026.

Masa do të jetë 50 lekë/litër. Sasia e karburantit për të cilën kërkohet kompensim nuk mund të tejkalojë sasinë e konsumuar për të njëjtën periudhë të vitit 2025. Për subjektet e regjistruara pas majit 2025, si referencë do të merret konsumi më i lartë i muajve janar-shkurt 2026.

Dokumentacioni i kërkuar

Subjektet duhet të paraqesin kërkesën e tyre pranë administratës tatimore ku janë të regjistruar, duke filluar nga data 10 e çdo muaji pasardhës. Dokumentet e nevojshme përfshijnë kërkesën zyrtare dhe të dhënat e NIUS-it; kopjen e licencës së vlefshme të transportit; të dhënat bankare (IBAN në lekë); faturat fizike të furnizimit me karburant (krahasimi 2025 vs 2026).

Për subjektet me shumë aktivitete vetëdeklarim dhe fletëdalje të karburantit sipas targave të mjeteve që kryejnë vetëm shërbimin e transportit.

Afatet e procedimit dhe pagesës

Qeveria ka përcaktuar afate strikte për të siguruar që paratë të kalojnë te bizneset sa më shpejt: 5 ditë punë për kthimin e kërkesës nëse dokumentacioni është i paplotë; 15 ditë punë koha që ka Administrata Tatimore për të dërguar urdhër-shpenzimin në Thesar (për linjat ndërqytetëse); 10 + 10 ditë punë koha totale e verifikimit dhe dërgimit të listave kur shpenzimet mbulohen nga Bashkia Tiranë; 5 ditë punë afati final që ka Thesari për të kryer pagesën në llogarinë e subjektit pas marrjes së urdhrit.

Aplikimet do të pranohen deri më datë 1 gusht 2026. Administrata Tatimore ka paralajmëruar kontrolle në vend për të shmangur abuzimet dhe për të verifikuar saktësinë e faturave të paraqitura. Ky vendim ngarkon Ministrinë e Financave, Bashkinë Tiranë dhe Drejtorinë e Përgjithshme të Tatimeve për zbatimin e menjëhershëm të tij.

/rtsh.al/