Përcaktohen zonat zyrtare për prodhimin e rrushit për verë
Qeveria shqiptare ka miratuar vendimin për përcaktimin e zonave të prodhimit të rrushit për verë, duke vendosur një kornizë të re për vreshtarinë në vend. Ky akt nënligjor, i marrë në mbështetje të ligjit “Për vreshtarinë dhe verën”, synon të rregullojë dhe standardizojë territorin sipas kushteve klimatike dhe gjeografike.
Sipas vendimit, territori i Republikës së Shqipërisë ndahet në tri zona kryesore të prodhimit, të cilat diktojnë specifikat e vreshtarisë:
- Zona CI (Zonë mesatare, pak e ngrohtë): Përfshin kryesisht territoret lindore dhe verilindore të vendit, të karakterizuara nga reliev i lartë dhe klimë relativisht më e freskët.
- Zona CII (Zonë e ngrohtë): Përfaqëson brezin tranzitor klimatik, që shërben si urë lidhëse midis ultësirës perëndimore dhe zonave më të freskëta lindore.
- Zona CIII (Zonë shumë e ngrohtë): Përfshin ultësirën perëndimore dhe zonat bregdetare, ku ndikimi detar dhe lartësia e ulët mbi nivelin e detit krijojnë kushtet më të favorshme për kultivimin e vreshtave.
Standardizimi dhe dokumentacioni GIS
Vendimi sjell një ndryshim të rëndësishëm në interpretimin territorial të vreshtarisë, duke i dhënë karakter detyrues të dhënave teknike. Në Aneksin 1 të vendimit përfshihen përshkrimi i hollësishëm i zonave, parametrat kryesorë për çdo qark, si dhe hartat e zonimit vreshtar në format GIS.
Këto harta do të shërbejnë si referencë zyrtare për të përcaktuar zonat homogjene për kultivarët autoktonë, duke përfshirë gjithashtu kufizimet dhe përjashtimet përkatëse.
Zbatimi i këtij vendimi i është ngarkuar Ministrisë së Bujqësisë dhe Zhvillimit Rural, e cila do të mbikëqyrë përputhshmërinë e prodhimit me këto përcaktime të reja klimatike.
/rtsh.al/