Prania ushtarake e SHBA-së në Evropë, gjeografia e bazave dhe ndryshimet e fundit gjeopolitike

Personeli ushtarak i Shteteve të Bashkuara mbetet një element kyç i arkitekturës së sigurisë në Evropë, me një shtrirje që përfshin rajone të ndryshme nga Gjermania dhe Azoret, deri në Rumani, Norvegjinë veriore dhe Siçili. Megjithatë, që prej rikthimit të Presidentit Donald Trump në Shtëpinë e Bardhë në vitin 2025, strategjia e vendosjes së këtyre trupave po përballet me rishikime të kushtëzuara nga marrëdhëniet dypalëshe dhe zhvillimet e fundit ndërkombëtare.

Gjermania, qendra kryesore e komandës amerikane

Gjermania vazhdon të mbajë peshën kryesore të pranisë ushtarake amerikane në kontinent. Sipas të dhënave të Departamentit të Mbrojtjes të SHBA-së, në fund të vitit të kaluar atje ishin të stacionuar mbi 36,400 personel ushtarak në detyrë aktive.

“Si EUCOM, qendra e komandës amerikane për operacionet ushtarake evropiane, ashtu edhe AFRICOM, e cila koordinon misionet në kontinentin afrikan, janë të vendosura në Shtutgart, në Gjermaninë jugperëndimore,” konfirmohet në analizën e strukturës komanduese.

Përveç Shtutgartit, baza ajrore në Ramstein shërben si qendër kyçe për misionet në Lindjen e Mesme dhe si stacion transmetimi për dronët, ndërsa në Landstuhl ndodhet spitali më i madh ushtarak amerikan jashtë territorit të SHBA-së. Gjithashtu, në bazën ajrore Büchel besohet se mbahen afërsisht 100 armë bërthamore në kuadër të doktrinës së NATO-s për ndarjen bërthamore.

Italia dhe Mbretëria e Bashkuar, vazat strategjike të mbështetjes

Italia dhe Mbretëria e Bashkuar renditen respektivisht në vendin e dytë dhe të tretë për nga numri i forcave të stacionuara:

Italia (rreth 12,700 ushtarë në vitin 2025) përfshin një brigadë ajrore si forcë reagimi të shpejtë, avionë luftarakë dhe selinë e operacioneve detare të SHBA-së për Evropën dhe Afrikën (NAVEUR-NAVAF) në Napoli.

Mbretëria e Bashkuar (rreth 10,200 ushtarë), strehon baza ajrore të rëndësishme të NATO-s për lëshimin e avionëve luftarakë dhe bombarduesve strategjikë.

Kthesa me Poloninë dhe përplasjet diplomatike

Në krahun lindor të NATO-s, vendosja e trupave ka pësuar lëkundje javët e fundit. Pasi Pentagoni anuloi në mes të majit dislokimin e 4,000 ushtarëve në Poloni si pjesë e Operacionit Atlantik Resolve, Presidenti Trump ka bërë një ndryshim të papritur të qëndrimit.

“Një njoftim i ngjashëm për të ndaluar një vendosje të planifikuar në Poloni u anulua të enjten, kur Trump tha se do të dërgonte 5,000 ushtarë shtesë atje për shkak të marrëdhënies së tij të mirë personale me presidentin nacionalist të krahut të djathtë të Polonisë, Karol Nawrocki,” bëhet e ditur nga zhvillimet e fundit.

Ky vendim vjen në një kohë kur marrëdhëniet me Berlinin janë tensionuar. Pas përplasjeve me kancelarin gjerman Friedrich Merz lidhur me konfliktin në Iran, Trump njoftoi tërheqjen e 5,000 ushtarëve nga Gjermania. Krahas kësaj, Uashingtoni ka konfirmuar se nuk do të respektojë marrëveshjen paraprake Biden-Scholz për stacionimin e raketave amerikane me rreze të mesme në Gjermani, e cila ishte parashikuar të zbatohej brenda këtij viti.

Rëndësia gjeografike dhe kufizimet e aleatëve

Përtej funksionit parandalues ndaj Rusisë përmes grupeve të betejës me rotacion gjashtëmujor, SHBA-të i përdorin këto baza për operacione globale. Megjithatë, disa aleatë kanë filluar të vendosin kufizime: Italia ka ndaluar uljen e bombarduesve në bazën Sigonella në Siçili, ndërsa Spanja ka mbyllur hapësirën e saj ajrore për fluturimet ushtarake amerikane drejt Lindjes e Mesme, duke sjellë paralajmërime për tërheqje trupash nga ana e Shtëpisë e Bardhë.

/rtsh.al/