Provimi i klasave të 5-ta, VANAF-i shërben si matës i performancës së mësuesve

Këtë të enjte, 27 mijë nxënës të klasave të pesta iu nënshtruan testimit kombëtar për vlerësimin e arritjeve. Edhe pse ky provim nuk është pengues për kalimin në vitin pasardhës, ai duket se ka tensionuar disi nxënësit, të cilët kanë shpalosur njohuritë e marra në arsimin fillor. Pas provimit, ata janë shprehur se testimi ka qenë i lehtë dhe kanë mundur t’i realizojnë të gjitha pyetjet.

Prindërit dhe gjyshërit janë shprehur të emocionuar për testimin e parë të rëndësishëm të fëmijëve të tyre, nëpërmjet të cilit bëhet kalimi nga cikli fillor në atë 9-vjeçar.

Ministrja e Arsimit, Mirela Kumbaro, në një urim drejtuar nxënësve të klasave të pesta, sqaroi se pikët me të cilat do të vlerësohen në këtë test do të shërbejnë për të analizuar anët e forta, si edhe çfarë duhet të përmirësohet në procesin e mësimdhënies.

Vlerësimi i këtij testimi në tre lëndët bazë  gjuhë shqipe, matematikë dhe dituri nuk do të reflektohet në dëftesë. Ai do të shërbejë si matës i performancës së mësuesve dhe shkollave.

/rtsh.al/