Qëndrimi i presidentit Trump, Zelensky takime me aleatët evropianë për planin e paqes

Presidenti ukrainas Volodymyr Zelensky pritet të takohet sot me aleatët kryesorë evropianë në Londër, pas akuzave të presidentit amerikan Donald Trump se ai nuk e ka lexuar ende propozimin e fundit të paqes.

Bisedimet e 8 dhjetorit në Londër vijnë pas tre ditësh negociatash mes zyrtarëve ukrainas dhe amerikanë në Majemi, ndërsa negociatorët përpiqen të gjejnë marrëveshje pas publikimit të draftit amerikan për paqe muajin e kaluar.

Plani me 28 pika u pa si i favorshëm kryesisht për Rusinë, dhe Kievi ka kundërshtuar disa nga kërkesat më të ashpra që presidenti rus Vladimir Putin ka promovuar që para nisjes së pushtimit të plotë të Ukrainës në shkurt 2022.

“Ne po fillojmë një javë të re diplomatike tani – do të ketë konsultime me liderët evropianë. Para së gjithash, çështje sigurie, mbështetje për qëndrueshmërinë tonë dhe paketa mbështetjeje për mbrojtjen tonë”, tha Zelensky në fjalimin e tij të mbrëmjes së djeshme.

Takimet e Zelenskyt në Londër përfshijnë mbështetësit më të mëdhenj të Kievit në Evropë: kryeministrin britanik Keir Starmer, presidentin francez Emmanuel Macron dhe kancelarin gjerman Friedrich Merz.

Liderët evropianë kanë mbërritur në Londër të vendosur për të treguar se janë ende plotësisht prapa shtytjes së Ukrainës për një plan paqeje që ruan territorin e saj, një mesazh që Zelensky e ka theksuar nëpër kontinent.

Starmer e ka quajtur aleatët “koalicionin e të gatshëm”, ndërsa Macron ka thënë se Evropa “ka letra të shumta në dorë” për të ndikuar në negociata, duke treguar frustrim ndaj qasjes amerikane.

Në anën tjetër, në Uashington më 7 dhjetor, presidenti amerikan Donald Trump kritikoi homologun e tij ukrainas, duke thënë se ishte “pak i zhgënjyer”.

“Kemi folur me presidentin Putin dhe kemi folur me liderët ukrainas, përfshirë Zelenskyn, dhe duhet të them se jam pak i zhgënjyer që presidenti Zelensky nuk e ka lexuar ende propozimin”, u tha Trump gazetarëve.

Negociatori kryesor i Ukrainës, Rustem Umerov, tha se do t’i raportojë Zelenskyt zhvillimet e fundit.

Një nga qëllimet kryesore të Kievit në bisedimet e Majemit ishte të merrte “të gjitha draftet e propozimeve aktuale për t’i diskutuar ato në detaje me Presidentin e Ukrainës”, shkroi Umerov në X.

“Sot, do t’i ofrojmë Presidentit të Ukrainës informacionin e plotë për të gjitha aspektet e dialogut me palën amerikane dhe të gjitha dokumentet”, theksoi ai.

Bisedimet në Majemi u përshkruan nga Zelensky si “konstruktive, por jo të lehta” pa arritur ndonjë përparim të dukshëm.

/rtsh.al/