RUSI – Plagoset një gjeneral i rangut të lartë

MOSKË, 6 shkurt /ATSH/ – Një gjeneral ushtarak rus i rangut të lartë ka qënë shënjestra e një atentati në Moskë

Gjeneral-lejtnant Vladimir Alexeyev u dërgua i plagosur menjëherë në spital pas sulmit në një ndërtesë banimi në periferitë veriperëndimore të kryeqytetit rus, dhe gjendja e tij klinike mbetet e panjohur.

Alexeyev është numri dy në Drejtorinë Kryesore të Inteligjencës Ushtarake të GRU-së ruse dhe është zyrtari i fundit i lartë ushtarak që është shënjestruar në kryeqytet që nga fillimi i pushtimit të plotë të Ukrainës gati katër vjet më parë.

Ai është nënshtruar sanksioneve nga Bashkimi Evropian dhe Mbretëria e Bashkuar pasi GRU u akuzua se qëndronte pas sulmit me agjent nervor në vitin 2018 në Salisbury, Britani e Madhe.

“Viktima u vizitua në një nga spitalet e qytetit,” tha Svetlana Petrenko e Komitetit Hetimor Rus, e cila tha se kishte hapur një çështje penale për tentativë vrasjeje.

Personi i armatosur iku dhe hetuesit shqyrtuan pamjet e kamerave të sigurisë për të gjetur të dhëna dhe filluan të intervistonin dëshmitarët.

Aleksejev luajti një rol të rëndësishëm gjatë luftës në Ukrainë, duke marrë pjesë në bisedimet me Ukrainën gjatë rrethimit rus të qytetit të Mariupolit në vitin 2022.

Ai u dërgua gjithashtu për të negociuar me kreun e grupit mercenar Wagner, Yevgeny Prigozhin, i cili udhëhoqi një kryengritje të shkurtër dhe të përgjakshme në qershor 2023.

Shefi i tij në GRU, Igor Kostyukov, kryesoi ekipin negociator rus që mori pjesë në bisedimet e sigurisë me Shtetet e Bashkuara dhe Ukrainën në Abu Dhabi.

Zëdhënësi i Kremlinit, Dmitry Peskov, tha se Presidenti Vladimir Putin ishte informuar për të shtënat.

“Para së gjithash, shpresojmë që gjenerali të mbijetojë dhe të shërohet. Shpresojmë kështu,” u tha ai gazetarëve.

Nuk dihet ende se kush ishte pas të shtënave të premten në mëngjes në një bllok banimi në autostradën Volokolamsk në Moskë, por ministri i Jashtëm rus, Sergei Lavrov, ka fajësuar Ukrainën.  /os/