Rama: Investimi në Banjat e Bënjës çon turizmin në një tjetër nivel

TIRANË, 25 shkurt/ATSH/ Punimet në Banjat e Bënjës po vazhdojnë dhe shumë shpejt kjo pasuri e rrallë natyrore do të ofrojë standarde moderne, duke ruajtur njëkohësisht vlerat historike dhe mjedisore që e bëjnë unike. Kryeministri Edi Rama ndau sot në rrjetet sociale pamje nga kantieri i punimeve në Banjat e Bënjës, që ndodhet rreth 14 kilometra larg qytetit të Përmetit, në njësinë administrative Petran, vetëm 3 kilometra nga pika ku lumi Vjosa bashkohet me përroin e Lëngaricës.

Rama theksoi se investimi parashikon krijimin e një zone parkimi të sistemuar, korsi biçikletash, ballkone panoramike mbi kanion, hyrje e organizuar, banja publike dhe qendër shëndetësore.

Një transformim i plotë, që sipas tij, “e çon turizmin në një tjetër nivel”.

Aktualisht, Rama bëri të ditur se ka nisur edhe faza e arredimit, vendosjes së parvazëve të shkallëve dhe shtrimit të dyshemesë me dru dekorativ pranë vaskave, për një pamje më të bukur dhe në harmoni me natyrën.

“Investimi i Qeverisë Shqiptare, i zbatuar nga Fondi Shqiptar i Zhvillimit, në bashkëpunim me Agjencinë Kombëtare të Zonave të Mbrojtura dhe Bashkinë Përmet, po merr formë çdo ditë”, u shpreh ai. Të hapura në natyrë, këto burime dallohen për temperaturën që varion nga 26 deri në 32 gradë Celsius.

Zona ofron një përzierje të veçantë mes natyrës së paprekur, historisë dhe aventurës. Krahas banjave termale, vizitorët mund të eksplorojnë edhe Kanioni i Lëngaricës si dhe Urën e Katiut, monument kulture që i shtojnë vlerë trashëgimisë së zonës.

/a.f/