SHBA – Hillary dhe Bill Clinton do të japin dëshmi për Epstein-in para Komitetit të Kongresit

NJU JORK, 26 shkurt /ATSH/- Anëtarët e Komitetit të Mbikëqyrjes së Dhomës së Përfaqësuesve, të udhëhequr nga republikanët, do të marrin sot dëshmi nga ish-sekretarja amerikane e Shtetit, Hillary Clinton, ndërsa ish-presidenti Bill Clinton do të dëshmojë ditën tjetër, në kuadër të hetimeve ndaj Jeffrey Epstein, sipas “NBC News”.

Dëshmitë do të jenë pas dyerve të mbyllura dhe të regjistruara me video në rezidencën e Clinton-ëve në Chappaqua, Nju Jork.

Komiteti, fillimisht lëshoi një thirrje për të dëshmuar në gusht 2025, ndërsa seancat e depozitave ishin planifikuar fillimisht për tetor 2025, por sipas kryetarit të komitetit, James Comer (R-Ky.), Clinton-ët kanë bërë tërheqje dhe vonesa në bashkëpunim.

Të dy, Hillary dhe Bill Clinton kanë mohuar çdo lidhje të paligjshme me Epstein.

Hillary Clinton deklaroi se nuk kishte informacion të ri për komitetin, duke shtuar se ky hetim kishte për qëllim të shpërqendronte vëmendjen nga lidhjet e ish-presidentit Donald Trump me Epstein.

Sipas dokumenteve publike:

• Bill Clinton udhëtoi katër herë me avionin e Epstein në vitet 2002–2003 për udhëtime të “Fondacionit Clinton”.
• Hillary Clinton nuk është takuar me Epstein, por ka njohur Ghislaine Maxwell, e dënuar për trafik seksual në vitin 2021.
• Maxwell tha më herët se Bill Clinton ishte shoku i saj, jo i Epstein, dhe se ajo kishte organizuar udhëtimet e “Fondacionit Clinton”duke përdorur avionin e Epstein.
• Maxwell ishte e pranishme në ngjarjet e rëndësishme të familjes Clinton, përfshirë dasmën e Chelsea Clinton (2010) dhe në takimet e “Clinton Global Initiative”.

Në deklarata dërguar Komitetit, Bill dhe Hillary Clinton thonë se nuk kanë njohuri personale për aktivitetet kriminale të Epstein ose Maxwell. //a.i/