SHBA – Ish-sekretari i Thesarit, Larry Summers dorëhiqet si lektor në Harvard pas skandalit Epstein
UASHINGTON, 25 shkurt /ATSH-AFP/ – Larry Summers, sekretari i Thesarit i SHBA-së nën presidencën Clinton, i cili u bë president i Harvardit në vitet 2000, dha sot dorëheqjen nga pozicioni i tij si mësimdhënës në universitet pas publikimit të korrespondencës së tij me email me Jeffrey Epstein, sipas një zëdhënësi të universitetit.
“Si pjesë e shqyrtimit të vazhdueshëm nga universiteti të dokumenteve të lidhura me Jeffrey Epstein të publikuara së fundmi për publikun nga qeveria, dekani i Harvardit pranoi dorëheqjen e profesorit”, tha Jason Newton në një deklaratë.
Larry Summers njoftoi nëntorin e kaluar se po tërhiqej nga jeta publike, duke ruajtur pozicionin e tij si mësimdhënës.
Një ekonomist i shquar që punoi gjithashtu nën administratën Obama si kreu i organit të koordinimit të politikave ekonomike të Shtëpisë së Bardhë, Larry Summers shfaqet vazhdimisht në dosjen e çështjes që lidhet me shkelësin seksual të Nju Jorkut të gjetur të varur në qelinë e tij në vitin 2019.
Midis dokumenteve gjyqësore të publikuara nga qeveria, emri i Summers shfaqet në librin e adresave dhe ditarët e Epstein, si dhe në shkëmbimet që lidhen me çështje akademike dhe filantropike, veçanërisht gjatë kohës së Epstein si president i Harvardit.
Ish-financuesi bëri disa donacione për universitetin, rreth 9,1 milionë dollarë midis viteve 1998 dhe 2008.
Vetëm përmendja e emrit të një personi në dosjen e çështjes Epstein nuk nënkupton ndonjë shkelje nga ana e atij personi.
Por, dokumentet e publikuara për publikun të paktën zbulojnë lidhje midis shkelësit të dënuar seksual Jeffrey Epstein ose bashkëpunëtorëve të tij dhe figurave të caktuara që shpesh e kanë minimizuar, ose madje e kanë mohuar, ekzistencën e marrëdhënieve të tilla.
Njoftimi i kësaj dorëheqjeje vjen në prag të një seance dëgjimore me ish-sekretaren e Shtetit Hillary Clinton para komitetit hetimor të Dhomës së Përfaqësuesve për çështjen Epstein.
Një seancë tjetër dëgjimore do të mbahet edhe me bashkëshortin e saj, Bill Clinton, i cili kishte një miqësi të gjatë me financierin e Nju Jorkut./ a.jor.