SHBA – Matt Gaetz tërhiqet si i zgjedhuri i Trump për prokuror të përgjithshëm
UASHINGTON, 21 nëntor /ATSH-DPA/ – Matt Gaetz, i zgjedhuri i presidentit të sapozgjedhur të SHBA-së, Donald Trump për prokuror të përgjithshëm, ka tërhequr emrin e tij, pasi u vu nën një shqyrtim intensiv mbi akuzat për ngacmim seksual.
Njoftimi i Gaetz erdhi një ditë pasi ai kërkoi të siguronte mbështetjen e senatorëve në Uashington, të cilët do të kenë fjalën e fundit në miratimin e kandidatëve të kabinetit Trump.
“Kam pasur disa takime të shkëlqyera me senatorë dje, i vlerësoj reagimet e tyre dhe mbështetjen e jashtëzakonshme të shumë njerëzve”, shkroi Gaetz në një postim në X.
”Unë i vlerësoj përpjekjet e fundit të Matt Gaetz në kërkimin për t’u konfirmuar si sekretar i Drejtësisë. Ai po punonte mirë, por në të njëjtën kohë ai nuk donte të ishte një shpërqendrim për administratën, të cilën unë e respektoj. Matt ka një të ardhme të shkëlqyer dhe mezi pres të shoh gjërat e mëdha që ai do të bëjë”, deklaroi nga ana e tij Trump në rrjetin e tij social Truth duke komentuar tërheqjen e Gaetz nga gara për sekretar të Drejtësisë.
Gaetz, një ish-anëtar i Dhomës së Përfaqësuesve të Floridës së ekstremit të djathtë dhe një nga mbështetësit më të zjarrtë të Trump, u emërua një javë më parë nga Trump si zyrtari më i lartë i zbatimit të ligjit në Shtetet e Bashkuara./ /os/