SHBA – Rubio: Faza ofensive e luftës me Iranin ka mbaruar
UASHINGTON, 5 maj /ATSH-AFP/ – Sekretari i Shtetit i SHBA-së, Marco Rubio, pohoi sot se faza ofensive e konfliktit me Iranin kishte mbaruar, gjatë një konference për shtyp në Shtëpinë e Bardhë.
“Operacioni ka mbaruar… siç edhe presidenti ia ka thënë Kongresit. Ne e kemi kaluar atë fazë”, deklaroi ai.
Sekretari i Shtetit i SHBA-së theksoi se Uashingtoni tani ishte në një fazë “mbrojtëse”, me një operacion të ri të njoftuar nga Donald Trump dhe të quajtur “Project Freedom”.
Marco Rubio tha se ky operacion kishte për qëllim posaçërisht shpëtimin e ekuipazheve të anijeve të bllokuara në Ngushticën e Hormuzit, duke deklaruar se 10 civilë kishin vdekur si rezultat i mbylljes së kësaj rruge strategjike ujore nga Irani.
Sekretari i Shtetit i SHBA-së siguroi se Shtetet e Bashkuara nuk do të hapnin zjarr me iniciativën e tyre, por shtoi se nëse do të shënjestroheshin, forcat amerikane që kryenin operacionin do të përgjigjeshin “me efikasitet vdekjeprurës”.
Donald Trump e kishte paralajmëruar Kongresin se armiqësitë kundër Iranit kishin “mbaruar” në një letër dërguar zyrtarëve të kongresit.
“Më 7 prill 2026, urdhërova një armëpushim dyjavor. Armëpushimi është zgjatur që atëherë. Nuk ka pasur shkëmbim zjarri midis forcave amerikane dhe Iranit që nga 7 prilli 2026. Armiqësitë që filluan më 28 shkurt 2026 kanë përfunduar”, shkroi ai.
Ai deklaroi se po zbatonte ligjin që kërkon që presidenti i SHBA-së të marrë autorizimin e Kongresit për të zgjatur një konflikt përtej 60 ditëve./ a.jor.