SHBA – Trump: SHBA-ja do të kontribuojë me 10 miliardë dollarë në Bordin e Paqes

UASHINGTON, 19 shkurt /ATSH-afp/ – Presidenti amerikan, Donald Trump njoftoi sot se Shtetet e Bashkuara do të kontribuonin me 10 miliardë dollarë për Bordin e Paqes, i cili po mban takimin e tij të parë në Uashington.

Misioni fillestar i Këshillit të Paqes është të punojë drejt rindërtimit të Rripit të Gazës, por presidenti i SHBA-së i ka dhënë atij një mandat më të gjerë që synon zgjidhjen e konflikteve në të gjithë botën.

Presidenti i SHBA-së, Donald Trump tha sot se anëtarët e Bordit të Paqes kishin dhuruar më shumë se shtatë miliardë dollarë për ndihmën në Gaza, sipas “NBC News”.

Në fjalën e tij, presidenti Trump tha se udhëheqësit e disa kombeve, përfshirë Kazakistanin, Azerbajxhanin, Emiratet e Bashkuara Arabe, Marokun, Bahreinin, Katarin, Arabinë Saudite, Uzbekistanin dhe Kuvajtin, kishin kontribuar të gjithë më shumë se 7 miliardë dollarë për paketën e ndihmës.

“Shumë të tjerë po kontribuojnë… Ky është takimi ynë i parë”, tha Trump.

Presidenti Trump shtoi se Norvegjia kishte pranuar të priste takimin e radhës të Bordit të Paqes.

“Jam i emocionuar të njoftoj se Norvegjia ka rënë dakord të presë një ngjarje që bashkon Bordin e Paqes”, tha Trump gjatë fjalimit të tij.

Norvegjia, më herët njoftoi se nuk do t’i bashkohej menjëherë Bordit të Paqes. Nuk është e qartë nëse qëndrimi i tyre ka ndryshuar.

Trump gjithashtu kritikoi Norvegjinë sepse nuk iu dha Çmimi Nobel për Paqen.

“Çmimi përcaktohet nga një komitet, jo qeveria norvegjeze”, tha presidenti amerikan.

Trump tha se SHBA-ja do të kontribuonte 10 miliardë dollarë në Bordin e Paqes.

“Ne kemi pasur mbështetje të madhe”, tha ai. “Dhe kjo shifër është shumë e vogël kur e krahason me koston e luftës”, shtoi ai./ /a.i/ a.jor.