SHBA – Trump shkarkon sekretaren e Sigurisë Kombëtare, Kristi Noem
UASHINGTON, 5 mars /ATSH-DPA/- Presidenti i Shtetet e Bashkuara të Amerikës, Donald Trump, ka shkarkuar sekretaren e Sigurisë Kombëtare, Kristi Noem, njoftim që ai e bëri të sot në platformën e tij “Truth Social”.
Sipas Trump, senatori i Oklahoma-s, Markwayne Mullin, do të marrë drejtimin e Departamentit përgjegjës për Agjencitë e Emigracionit dhe Mbrojtjes së Kufirit, duke filluar nga 31 marsi.
“Kristi Noem, e cila na ka shërbyer mirë dhe ka pasur rezultate të shumta dhe spektakolare (sidomos në kufi!), do të kalojë në rolin e të dërguarës speciale për “The Shield of the Americas”, nismën tonë të re të sigurisë në hemisferën perëndimore që do ta shpallim të shtunën në Doral, Florida. E falënderoj Kristin për shërbimin e saj”, shkroi Trump.
Me këtë vendim, Noem bëhet ministrja e parë e administratës aktuale amerikane që largohet nga posti.
Trump theksoi se Mullin ka qenë anëtar i Dhomës së Përfaqësuesve të Shteteve të Bashkuara të Amerikës për 10 vjet dhe senator për tre vjet.
Ai pritet të fokusohet kryesisht në sigurinë e kufirit dhe në luftën kundër krimit nga migrantët pa leje qëndrimi.
Dikur kandidatja e preferuar e Trump
Kristi Noem, dikur kandidatja e preferuar e Donald Trump për këtë post, ka qenë më parë guvernatore e South Dakota dhe u bë e njohur si një mbështetëse e fortë e presidentit.
Edhe para emërimit si sekretare, ajo e kishte përshkruar situatën në kufirin jugor mes Shtetet e Bashkuara të Amerikës dhe Meksikës si një “zonë lufte”.
Në një moment ajo u konsiderua edhe si kandidate për zëvendëspresidente të Trump.
Nën presion për operacionet ndaj migrantëve
Së fundmi, gjatë një seance në Senatin e Shteteve të Bashkuara të Amerikës, 54-vjeçarja u pyet për vdekjet gjatë operacioneve të agjencive të emigracionit dhe mbrojtjes së kufirit që kishin në shënjestër migrantët, si dhe për taktikat e përdorura nga departamenti i saj.
Operacionet, që në disa raste u cilësuan brutale, çuan në protesta në mbarë vendin. Kritikët akuzojnë administratën dhe Noem për shkelje të të drejtave civile.
Megjithatë, deri në fund të janarit, Donald Trump kishte shprehur publikisht mbështetje për të, duke thënë se ajo po bënte “një punë shumë të mirë”, pasi oficerët federalë qëlluan për vdekje dy qytetarë amerikanë gjatë përplasjeve me banorë lokalë. //a.i/