SHBA: Dumani vendosi standardin e bashkëpunimit mes dy vendeve kundër organizatave kriminale ndërkombëtare, shpresojmë që kjo të vijojë edhe me pasardhësin e tij
Shtetet e Bashkuara të Amerikës kanë rikonfirmuar mbështetjen për Prokurorinë e Posaçme (SPAK) në luftën kundër krimit të organizuar dhe korrupsionit.
Ambasada e SHBA në Tiranë ka njoftuar se Zëvendësdrejtori për Çështjet e Evropës Perëndimore Qendrore, Lyn Debevoise, ka zhvilluar sot një vizitë zyrtare në zyrat e SPAK, ku është takuar me Drejtuesin e Prokurorisë së Posaçme, Altin Dumani.
Sipas njoftimit zyrtar të shpërndarë në rrjetet sociale, vizita kishte për qëllim të përcillte vlerësimin e Uashingtonit për punën e bërë nga Dumani në koordinim me agjencitë ligjzbatuese amerikane.
Theksi i bisedës u vendos te dy shtylla kryesore: Përballja me rrjetet e paligjshme kriminale që kërcënojnë sigurinë e Shteteve të Bashkuara; lufta kundër korrupsionit, si një fenomen që pengon kompanitë dhe investitorët amerikanë të operojnë lirisht.
“Përballja me krimin ndërkombëtar kërkon një angazhim të përbashkët,” thuhet në reagimin e ambasadës.
Në deklaratën e ambasadës theksohet kërkesa për vazhdimësinë e punës së institucionit.
“Përpjekjet e Dumanit vendosën standardin për bashkëpunim të fortë mes Shteteve të Bashkuara dhe Shqipërisë kundër organizatave kriminale ndërkombëtare, i cili shpresojmë se do të vazhdojë me pasardhësin e tij,” thekson në postim ambasada amerikane.
/rtsh.al/