SHBA-të hedhin poshtë pretendimet se Hamasi po shkel marrëveshjen e armëpushimit me Izraelin

SHBA-të kanë hedhur poshtë pretendimet se Hamasi po shkel marrëveshjen e armëpushimit me Izraelin duke mos i kthyer të gjitha trupat e pengjeve që nuk jetojnë më.

Vetëm 9 nga 28 eshtrat e këtyre pengjeve janë dorëzuar në Izrael, ndërsa Hamasi ka kërkuar më shumë kohë dhe pajisje të specializuara për të nxjerrë trupat e pajetë nga rrënojat e Gazës.

Dy trupat e fundit iu dorëzuan Izraelit një ditë më parë (15 tetor), të identifikuar si Inbar Hayman dhe Rreshter Maj Muhammad al-Atresh.

Debati mbi kthimin e eshtrave të pengjeve që nuk jetojnë më, ka shtyrë Izraelin të kufizojë furnizimet e premtuara të ndihmës për Gazën, por dy këshilltarë të lartë të Presidentit të SHBA-së, Donald Trump, kanë thënë se planet për të demilitarizuar Rripin dhe për të ndërtuar një qeveri të re kalimtare, janë në proces.

Në një përditësim mbi zbatimin e planit të paqes prej 20 pikash të Trump, këshilltarët e presidentit amerikan u thanë gazetarëve se qeveria e SHBA deri më tani nuk besonte se Hamasi e kishte shkelur marrëveshjen duke mos tërhequr më shumë mbetje mortore.

Këshilltarët argumentuan se Hamasi kishte vepruar me mirëbesim duke i kthyer të gjithë pengjet e gjalla dhe po punonte me bashkëbisedues të ndryshëm për të gjetur dhe kthyer eshtrat e të tjerëve.

Një këshilltar i lartë amerikan tha se gjetja e të gjithë trupave mund të zgjasë me javë për shkak të nivelit të shkatërrimit në Gaza.

Ai tha se mund të ofrohen shpërblime për civilët e Gazës që japin informacione dhe se ekspertët turq pritet të bashkohen me kërkimin.

/rtsh.al/