SIRI – Latakia nën shtetrrethim pas protestave vdekjeprurëse

DAMASKË, 30 dhjetor /ATSH-DPA/- Guvernatori sirian i Latakias njoftoi sot një shtetrrethim pas protestave vdekjeprurëse në qytetin bregdetar.

Drejtoria e Sigurisë së Brendshme tha se shtetrrethimi do të zbatohej nga sot në mbrëmje deri nesër në mëngjes, ndërsa Komanda e Përgjithshme shtoi se nuk do të zbatohej për shërbimet e urgjencës, stafin mjekësor ose ekipet e ambulancës dhe zjarrfikësve.

Qyteti u përfshi dje në mbrëmje nga protesta vdekjeprurëse. Drejtoria e Shëndetit në Latakia raportoi katër të vrarë dhe 108 të plagosur për shkak të trazirave.

“Protestat kishin shpërthyer në disa provinca të dielën, përfshirë Latakia, e cila është kryesisht e populluar nga anëtarë të pakicës fetare alevite”, tha Observatori Sirian për të Drejtat e Njeriut (SOHR) me seli në BM – duke cituar rrjetin e saj të aktivistëve brenda Sirisë.

“Trazirat pasuan një thirrje nga udhëheqësi i shquar alevit, Ghazal Ghazal për vetëvendosje”, sipas SOHR.

Që nga rrëzimi i ish-presidentit Bashar al-Assad në dhjetor 2024, Siria ka përjetuar shpërthime të shumta të dhunës vdekjeprurëse sektare, pavarësisht premtimeve të presidentit të përkohshëm Ahmed al-Sharaa, i cili udhëhoqi rebelët sunitë në përmbysje, për të mbrojtur komunitetet minoritare. //a.i/