Si po e shpëtojnë Barçën ‘shpikjet’ e Hansi Flickut?

Barcelona u rikthye te fitorja në mënyrë bindëse, duke triumfuar me rezultat 6-1 ndaj Deportivo Alavesit.

Reparti ofensiv i katalunasve ishte dominues gjatë gjithë ndeshjes, me Lamine Yamal dhe Raphinha që realizuan nga dy gola, ndërsa edhe Anthony Gordon dhe Fermin Lopez dhanë kontribut të rëndësishëm në këtë fitore.

Megjithatë, përtej paraqitjes së sulmuesve, ajo që ra veçanërisht në sy te Barcelona ishte kreativiteti i trajnerit Hansi Flick.

Siç raporton “Mundo Deportivo”, Flick po dëshmon më shumë se kurrë aftësitë e tij për të gjetur zgjidhje të pazakonta te Barcelona, në një kohë kur klubi po përballet me një krizë të dukshme lëndimesh në repartin defensiv.

Katalunasit janë pa shërbimet e Andreas Christensen, Eric Garcias, Jules Koundes dhe Xavi Espartit, duke e detyruar trajnerin gjerman të kërkojë alternativa të tjera.

Në ndeshjen ndaj Alavesit, risia e parë e madhe e Flickut ishte aktivizimi i Frenkie de Jongut në pozitën e qendërmbrojtësit.

Holandezi, i cili tashmë është rikthyer në gjendje të plotë fizike, kishte filluar të stërvitej në këtë pozitë gjatë javëve para kësaj ndeshjeje.

De Jong më në fund u paraqit si qendërmbrojtës ndaj Alavesit dhe zhvilloi një ndeshje solide.

Një tjetër vendim interesant i Flickut ishte aktivizimi i Brian Farinas, mesfushor qendre, në pozitën e mbrojtësit të djathtë.

Edhe futbollisti i ri zhvilloi një paraqitje të mirë, gjë të cilën e pranoi edhe vetë trajneri gjerman pas ndeshjes.

Kjo nuk është hera e parë që Barcelona detyrohet të mbështetet në kreativitetin e Flickut për të gjetur zgjidhje, në një periudhë kur klubi po përballet me probleme financiare dhe një numër të madh lëndimesh.

Kur Barcelona nuk arriti ta transferonte Julian Alvarezin gjatë verës, Flick gjeti një zgjidhje duke e përshtatur Raphinhan në rolin e sulmuesit të rremë. Ky ndryshim ka rezultuar jashtëzakonisht i suksesshëm.

E njëjta gjë mund të thuhet edhe për Espartin, i cili është mbrojtës i djathtë, por tashmë është shndërruar në një prej alternativave kryesore të Barcelonës në krahun e majtë të mbrojtjes.

De Jong dhe Farinas janë emrat më të rinj në listën e futbollistëve që Flick ka përshtatur në pozita të ndryshme, duke e mbajtur Barcelonën konkurruese. Dhe me gjasë, ata nuk do të jenë të fundit që do të provohen në role të reja gjatë këtij sezoni.

Pikërisht për këtë arsye, do të jetë e rëndësishme që Barcelona të përforcohet gjatë afatit kalimtar të janarit, veçanërisht në repartin defensiv./GazetaExpress/