Spanjë, të paktën 12 të arrestuar në një operacion ndaj grupit neonazist

schedule17:40 - 6 Nëntor, 2026

Policia spanjolle tha të premten se ka arrestuar të paktën 12 anëtarë të grupit Nucleo Nacional, të cilin mediat spanjolle e përshkruajnë si neonazist, gjatë një operacioni në shtatë provinca.

Policia Kombëtare njoftoi në platformën sociale amerikane X se operacioni u zhvillua në Madrid, Asturias, Guadalajara, Valladolid, Pontevedra, Burgos dhe Alicante. Televizioni spanjoll Cadena SER raportoi më vonë se të paktën 14 persona janë ndaluar, përfshirë liderin e grupit, Ivan Rico, dhe ideologen e tij, Isabel Peralta.

Hetimi ka të bëjë me dyshimet për krime të urrejtjes, organizim të paligjshëm dhe posedim armësh, raportoi e përditshmja spanjolle El Pais, duke cituar burime nga Gjykata e Lartë e Drejtësisë në Asturias.

Sipas El Pais, hetimi nisi pas trazirave në shkurt në qytetin verior Gijon, ku mbetën të lënduar disa studentë.

– Nga mobilizimi në rrugë te partia politike

Sipas El Pais, Nucleo Nacional ndërthur ideologjinë raciste dhe neonaziste dhe u shfaq në kuadër të protestave të ekstremit të djathtë kundër ligjit të amnistisë në Spanjë, të zhvilluara para selive të Partisë Socialiste në nëntor të vitit 2023.

Në faqen e saj të internetit, Nucleo Nacional bën thirrje për mbrojtjen e “racës dhe kulturës sonë” dhe kufizimin e shërbimeve publike shëndetësore dhe arsimit vetëm për “popullin tonë”. Grupi gjithashtu mbron rolet tradicionale gjinore dhe vlerat e krishtera, ndërsa liberalizmin, marksizmin dhe progresivizmin i cilëson si ideologji “të degjeneruara”.

Grupi fitoi status zyrtar ligjor në vitin 2024, kur u regjistrua në Ministrinë e Brendshme si shoqatë qytetare-politike.

Megjithatë, aktivitetet e tij kanë nxitur vazhdimisht hetime policore. Në prill të vitit 2025, Garda Civile nisi një hetim pasi grupi publikoi një video ku bënte thirrje për “mbrojtjen aktive” të rrugëve dhe luftën kundër një “pushtimi” nga imigrantët.

Në atë kohë, ministri i Brendshëm, Fernando Grande-Marlaska, e cilësoi këtë retorikë si tejet shqetësuese dhe tha se pamjet rikujtonin periudha të errëta të historisë.

Nucleo Nacional u regjistrua si parti politike në shkurt, por nuk do të marrë pjesë në zgjedhjet e përgjithshme në Spanjë më 29 nëntor. Në vend të kësaj, u ka bërë thirrje mbështetësve të votojnë për Falange Espanola, sipas Cadena SER.

Kontrollet policore u zhvilluan një ditë para demonstratës që grupi kishte planifikuar të mbante në Madrid kundër, ndër të tjera, asaj që e cilësonte si “pushtim të Ceutës” dhe “zëvendësim etnik”, sipas publikimeve të tij në X.

Mos rri jashtë: bashkohu me ABC News. Ne jemi kudo!