TEL AVIV – Izraeli akuzon Hamasin për shkelje të rëndë të armëpushimit në Gaza
TEL AVIV, 19 tetor /ATSH-DPA/- Ushtria izraelite ka akuzuar organizatën terroriste islamike “Hamas” për kryerjen e një “shkeljeje të rëndë” të armëpushimit në Gaza duke kryer disa sulme të drejtpërdrejta ndaj trupave izraelite, tha sot një zyrtar i lartë ushtarak i Izraelit.
Incidentet thuhet se kanë ndodhur përtej vijës së rënë dakord, e njohur si “vija e verdhë”, që shënon vijën e tërheqjes për trupat izraelite brenda Gazës. Ushtria izraelite u tërhoq më 10 tetor, kur hyri në fuqi marrëveshja aktuale e armëpushimit.
“Trupat izraelite u sulmuan me raketë”, tha zyrtari ushtarak. Përveç kësaj, një snajper palestinez thuhet se qëlloi drejt një njësie izraelite.
“Të dy incidentet ndodhën në një zonë të kontrolluar nga Izraeli në lindje të vijës së verdhë,” deklaroi zyrtari.
“Kjo përbën një shkelje të rëndë të armëpushimit”, tha ai.
Media izraelite raportoi më herët se Hamasi kishte sulmuar trupat izraelite në Rripin jugor të Gazës.
“Forcat Ajrore Izraelite më pas goditën objektiva në Rafah”, sipas raportimeve. //a.i/