TURQI – Zjarret pyjore vazhdojnë të shpërthejnë në Izmir

IZMIR, 4 korrik /ATSH-DPA/ – Shërbimet e emergjencës kane vazhduar të luftojnë me zjarret në provincën turke të Izmirit të premten.

“Situata në rajon është e tmerrshme”, tha sot kryetari i bashkisë së qytetit të Izmirit, Cemil Tugay.

Rajoni Odemis është prekur veçanërisht keq. Burimi i zjarreve është i vështirë për t’u arritur dhe tre fshatra janë shkatërruar tashmë. Erërat e forta po pengojnë më tej përpjekjet për shuarjen e zjarreve.

Ndërkohë, ka shpresë për rajonin e Çeşmesë, i cili është i njohur për pushuesit.

“Zjarri në rajonin e Çeşmesë është nën kontroll”, shkroi sot ministri turk i Bujqësisë dhe Pylltarisë, Ibrahim Yumaklı, në platformën X.

“Përpjekjet për shuarjen e zjarreve po vazhdojnë ende”, shtoi ai.

Besohet se zjarri në Çeşme, i cili shpërtheu të mërkurën, u shkaktua nga një linjë elektrike e dëmtuar. Ai shpejt u shndërrua në një flakë të madhe që u përhap në pyjet përreth.

Dy persona vdiqën të enjten si pasojë e zjarreve në Izmir.

Rreziku i zjarreve pyjore mbetet i lartë për shkak të nxehtësisë, kushteve të thata dhe erërave të forta.

Sipas ministrit, 624 zjarre shpërthyen në të gjithë vendin vetëm një jave. Shumica prej tyre tani janë nën kontroll. //a.i/