UASHINGTON – SHBA-ja urdhëron diplomatët jo-thelbësorë të largohen nga Arabia Saudite

KAJRO, 9 mars /ATSH-DPA/- Departamenti Amerikan i Shtetit u ka kërkuar diplomatëve jo-thelbësorë të largohen nga Arabia Saudite “për shkak të rreziqeve të sigurisë”.

“Më 8 mars 2026, Departamenti Amerikan i Shtetit urdhëroi punonjësit jo-emergjentë të qeverisë amerikane dhe anëtarët e familjeve të punonjësve të qeverisë amerikane të largohen nga Arabia Saudite për shkak të rreziqeve të sigurisë”, tha sot ambasada amerikane në Riad në një njoftim.

Departamenti më herët u kërkoi qytetarëve në më shumë se 12 vende në të gjithë rajonin të largoheshin menjëherë për shkak të rreziqeve të sigurisë pas konfliktit në Iran, i cili filloi në fund të shkurtit.

“Pas fillimit të armiqësive midis SHBA-së dhe Iranit më 28 shkurt, ka pasur një kërcënim të vazhdueshëm për sulme me dronë dhe raketa nga Irani dhe ndërprerje të konsiderueshme të fluturimeve komerciale”, tha ambasada në një deklaratë.

“Qeveria amerikane ka aftësi të kufizuar për të ofruar shërbime emergjente për qytetarët amerikanë në Arabinë Saudite për shkak të rreziqeve të sigurisë”, thuhet në deklaratë.

Irani ka kryer sulme në të gjithë Lindjen e Mesme për më shumë se një javë në përgjigje të sulmeve ushtarake amerikane dhe izraelite. Sulmet kanë synuar bazat ushtarake amerikane, si dhe vende civile, të tilla si aeroportet dhe ndërtesat e banimit.

Sulme janë raportuar në rreth 12 vende arabe, me shtetet e Gjirit, përfshirë Emiratet e Bashkuara Arabe, Kuvajtin dhe Katarin, që raportojnë një numër veçanërisht të lartë incidentesh. //a.i/