Zelensky: Jam gati për një takim me Putinin, SHBA të reagojë fuqishëm nëse presidenti rus thotë “jo”

Presidenti ukrainas Volodymyr Zelensky u tha gazetarëve mbrëmë se është gati për një takim me homologun e tij rus, Vladimir Putin.

“Ne synojmë të organizojmë një takim trepalësh në të cilin do të marrë pjesë edhe presidenti i SHBA-së”, sqaroi ai.

Volodymyr Zelensky tha gjithashtu se do të donte të shihte një “reagim të fortë” nga Uashingtoni nëse presidenti rus nuk dëshiron të ketë një takim me të. Ai shtoi se nuk është e qartë se çfarë lëshimesh do të ishte e gatshme të bënte Moska.

“Unë iu përgjigja menjëherë një propozimi për një takim dypalësh: ne jemi gati. Por çfarë ndodh nëse rusët nuk janë gati?” tha ai. “Nëse rusët nuk janë gati, ne do të donim të shihnim një reagim të fortë nga Shtetet e Bashkuara.”

“Për të diskutuar se çfarë dëshiron të bëjë Ukraina, le të dëgjojmë së pari se çfarë dëshiron të bëjë Rusia. Ne nuk e dimë këtë.”

Zelensky nuk e do Budapestin

Lidhur me propozimin për t’u takuar në Budapest, presidenti ukrainas tha se ishte “problematik” dhe përmendi Zvicrën, Austrinë ose Turqinë si alternativa.

“Ne e konsiderojmë të drejtë mbajtjen e takimit në një Evropë neutrale. Mbajtja e tij në Budapest “nuk është e lehtë” duke pasur parasysh afrimin midis Hungarisë dhe Rusisë”, shpjegoi presidenti ukrainas, duke shtuar se ai e ka përjashtuar opsionin e Moskës.

Presidenti Zelensky tha se i kishte kërkuar Donald Trump të bindte kryeministrin ukrainas Viktor Orban të ndalonte bllokimin e pranimit të Ukrainës në Bashkimin Evropian.

“I kërkova Presidentit Trump në Budapest të ndalonte bllokimin e pranimit tonë në Bashkimin Evropian. Presidenti Trump premtoi se ekipi i tij do të merrej me çështjen.”

Rusia po grumbullon forca në rajonin e pushtuar të Zaporizhias në Ukrainën jugore në pritje të një sulmi të mundshëm, paralajmëroi Volodymyr Zelensky.