1 Maji në Greqi, sindikatat tubime në gjithë vendin

Me moton “Askush i vetëm, të gjithë bashkë mundemi”, konfederata e përgjithshme sindikale, ajo e sektorit publik si dhe qendra punëtore e Athinës, u bëjnë thirrje gjithë punonjësve në Greqi t`u bashkohen tubimeve me rastin e 1 Majit, që do të organizohen në Athinë dhe qytetet e tjerë të vendit.

Tubimi kryesor i sindikatave do zhvillohet para bashkisë së Athinës.

Në këtë ditë nuk do të funksionojnë linjat detare nga porti i Pireut, për shkak të grevës 14 orëshe që kanë shpallur mekanikët e marinës tregtare, ndërsa ndryshime do të ketë dhe në orarin e mjeteve të transportit publik.

Sindikatat kërkojnë nga forcat politike që të angazhohen për të ndryshuar politikat në favor të punonjësve dhe të popullit, duke theksuar se “1 maji i këtij viti dhe tubimet kanë karakteristikë veçanërisht luftarake, pas masave të vazhdueshme, të ashpra, të padrejta dhe antishoqërore që janë imponuar nga trojka dhe qeveria”.