111 të vdekur nga përmbytjet në Kinë

Prej ditësh Kina Lindore është përfshirë nga stuhi me reshje të dendura të shiut, që sipas autoriteteve vendase nuk janë regjistruar që prej 60 vjetësh.

Reshjet e mëdha të shiut vijojnë të shkaktojnë probleme kryesisht në Pekin dhe rajonet përreth. Kanalizimet u bllokuan dhe uji vërshoi në shumë rrugë duke paralizuar lagje të tëra të kryeqytetit. Vetëm në Pekin, mediat shtetërore njoftuan për 37 persona të vdekur, ndërsa në gjithë zonat e prekura nga reshjet e mëdha, numri i viktimave shkon në 111.

Grupet e emergjencës dhe mijëra ushtarë janë përfshirë në operacionet e kërkim-shpëtimit, ndërsa po punohet edhe për zhbllokimin e rrugëve të kryeqytetit nga makinat e bllokuara mes baltës së lënë pas nga shirat e rrëmbyeshëm.

Ndërkohë, zyrtari i parë i Partisë Komuniste në Pekin dha dorëheqjen nga posti i tij e bashkë me të edhe zëvendësi i tij.

Mediat ndërkombëtare njoftojnë se dorëheqja e dy zyrtarëve të lartë lidhet me keq-menaxhimin e situatës emergjente të shkaktuar nga reshjet e shiut. Por media shtetërore në Pekin njoftoi se dorëheqja ishte në kuadër të rotacionit politik në radhët e partisë.