“Atlasi i Turbullt” në Toronto

Toronto International Film Festival është njëri ndër festivalet më të rëndësishme filmike në botë, ngase për çdo vit shikuesve iu ofron shumë premiera atraktive. Festivali fillon të enjten (sot).

Në mesin e filmave të shumtë, sigurisht që më i rëndësishmi është filmi “Cloud Atlas”, një film ky i ri dhe ambicioz i zhanrit fantastiko-shkencor, me regji të duetit fantastik, Lan dhe Andy Wachowski (autorë të kult-filmit “Matrix”), në bashkëpunim me Tom Tykwer (autor i filmit “Run, Lola, Run”.

Filmi “Cloud Atlas” ka kohë që pritet nga adhuruesit, kështu që shfaqja e tij në Toronto nënkupton edhe fillimin e distribuimit të tij në kinematë botërore.

Veç tij, në program janë edhe trileri erotik i regjisorit Brian De Palma, “Epshi”, i cili pothuajse paralelisht do të shfaqet edhe në festivalin e Venecias, por edhe filmi dokumentar për pop-yllin e ndjerë Michael Jackson, “Bad 25”, i regjisorit Spike Lee.

Gjithashtu pjesë e filmave të përzgjedhur për sivjet është edhe ekranizimi i romanit mitik “Në Rrugë”, të autorit Jack Kerouac, me regji të Walter Salles.