4 vendet ku të rrezikohet jeta në Tiranë, sipas ambasadës së SHBA-së
Ambasada Amerikane në Tiranë u ka dërguar një email urgjent dhe paralajmërues gjithë shtetasve amerikanë që jetojnë në Shqipëri. Emaili u sugjeron qytetarëve amerikanë që jetojnë në Tiranë të mos frekuentojnë disa ambjente në kryeqytetin shqiptar, ku, sipas informacionit të kësaj ambasade, u rrezikohet jeta.
Në emailin konfidencial, një kopje të të cilit, Shekulli ka siguruar këto ditë, lokalizohen qartë dhe me detaje 4 zonat e rrezikshme, të cilat janë dy bar-kafe, një restorant dhe një qendër tregtare.
Ambasada e SHBA në Tiranë njofton shtetasit amerikanë se për shkak të shqetësimeve për sigurinë, personelit të ambasadës së SHBA-së iu ndaluar të shkojnë në vendet e mëposhtme në Tiranë, thuhet në fillim të emailit ku më pas renditen dy bar-kafe, pranë një hoteli të njohur, një restorant dhe një qendër tregtare. Për këtë të fundit emaili paralajmërues thotë që ..mbetet subjekt i një kufizimi që ka qenë që prej vitit 2009
Qytetarët amerikanë duhet ti shmangin këto vende thuhet më tej në emailin e Ambasadës Amerikane në Tiranë. Më pas aty jepen informacione lidhur me numrat e kontaktit dhe prezencën e ambasadës në rast rreziku.
Katër ambjentet e përmendura në email nuk ndodhen në periferi të Tiranës, por në zonat më të populluara dhe më me aktivitet të saj. Në email jepen edhe objekte të tjerë publikë afër tyre, si përshembull një hotel mjaft i frekuentuar.
Nuk është e qartë se çfarë informacionesh ka qeveria amerikane që ka ndërmarrë një hap të tillë në mbrojtje të shtetasve të vet në Shqipëri. Një burim i Shekullit pranë Shërbimit Informativ Shtetëror thotë se paralajmërimi me gjasa lidhet me aktivitetin e një grupi kriminal dhe se disa arrestime të bëra ditët e fundit kanë të bëjnë pikërisht me këtë situatë. Burimi nuk ka dhënë siguri për këtë version, por e ka bërë të qartë se qeveria shqiptare është gjithashtu në dijeni të plotë të këtij rreziku për rendin publik që lidhet me zonën që përfshin paralajmërimi amerikan.
Emaili mban datën 14 tetor 2011 dhe ka statusin UNCLASSIFIED. Është dërguar nga Zyra e Shërbimeve për Qytetarët Amerikanë e Ambasadës së SHBA-ve në Tiranë.
Po shtetasit shqiptarë kush i lajmëron?
Ambasada Amerikane bën detyrën e vet në mbrojtje të qytetarëve amerikanë. Emaili që po botojmë sot, flet qartë për këtë kujdes, por pyetja që ngre çdokush që i bie në dorë një material i tillë është:Poshtetasit shqiptarë kush i mbron? Cili është rreziku ndaj të cilit ekspozohen njerëzit që shkojnë në këto ambjente? Çfarë informacionesh ka ambasada se mund të ndodhë? Ne thjesht mund të aludojmë mbi shkaqet, por e sigurt është që informacionin që ka një ambasadë, sigurisht që e ka edhe qeveria shqiptare. A mund të përgjigjet zyrtarisht dhe seriozisht Ministria e Brendshme pas këtij publikimi: Çfarë rreziqesh ka në këto ambjente? Çfarë masash janë marrë që ne që nuk jemi amerikanë të mos na rrezikohet jeta? Përse ne nuk lajmërohemi? I pari qytetari thoshte një slogan elektoral që deri pak javë më parë e dëgjonim në televizione që në urinimin e parë të sabahut. /Shekulli