Aksident në autostradë, 4 të plagosur rëndë

Katër persona të cilët udhëtonin në një makinë u aksidentuan rëndë sot paradite në autostradën Fushë Krujë- Lezhë. Dy prej të plagosurve të cilët ndodhen në spitalin Ushtarak janë në gjëndje kritike për jetën. 

FUSHE KRUJE- Një aksident automobilistik me 4 të plagosur rëndë është shënuar sot paradite në autostradën Fushë- Krujë – Lezhë.

Sipas policisë aksidenti ndodhi në afërsi të fshatit Derven pranë qytetit të Krujës, kur autovetura tip Benz me targa TR 5032 M, e cila po udhëtonte në drejtim të kryeqytetit ka dalë nga rruga. Nga aksidenti janë plagosur rëndë të 4 personat që po udhëtonin në mjet.

Të plagosurit (identiteti i të cilëve ende nuk është mësuar) janë dërguar në Spital Ushtarak në Tiranë dhe gjendja e tyre shëndetësore po mbahet nën kontroll nga mjekët e spitalit. Sipas bluzave të bardha dy nga të plagosurit, njëri prej tyre drejtuesi i automjetit dhe e plagosura tjetër një grua ndodhen në gjëndje kritike për jetën.

Sipas burimeve policore në vendngjarje mësohet se shkak i këtij aksidenti mund të ketë qenë një defekt, i cili ka shkaktuar dhe humbjen e kontrollit nga ana e drejtuesit të mjetit.

(s.g/BalkanWeb)