Aksioni për prishjen e ndërtimeve pa leje vijon në të gjithë vendin. Rama: Ecim, hap pas hapi

Aksioni i qeverisë për lirimin e hapësirave publike nga ndërtimet dhe zaptimet e paligjshme po vijon me intensitet në të gjithë territorin e vendit. Kjo nismë, e nisur në muajin korrik, është konceptuar si një ndërhyrje sistematike dhe e vazhdueshme dhe i paraprin zbatimit të programit të ri “Rilindja Urbane 2.0”, i cili synon kthimin e ligjshmërisë në territor.

Kryeministri Edi Rama e ka përshkruar aksionin si një proces të kujdesshëm dhe të vazhdueshëm.

“Ecim, hap pas hapi, lagje më lagje,” shkroi Kryeministri në rrjetet sociale, ndërsa ndau pamje nga shembjet e fundit të ndërtimeve pa leje.

Në mbështetje të këtij aksioni, qytetarëve u është vënë në dispozicion portali online “Hapësiraimepublike.gov.al” për denoncimin e rasteve abuzive.

Të dhënat e publikuara sot tregojnë se reagimi i publikut ka qenë i lartë:

Raste të raportuara: 13 712

Raste të zgjidhura: 10 176

Raste në shqyrtim: 3 536

Numri i lartë i rasteve të zgjidhura thekson prioritetin që po i jepet kësaj nisme në kthimin e hapësirave të zaptuara për zhvillimin dhe përdorimin e komuniteteve.

/rtsh.al/