Altin Haxhi, edhe dy javë jashtë fushave

Vazhdon periudha e pafat për Altin Haxhin. Gjatë fundjavës, mbrojtësi u kthye në fushë pas dëmtimit njëmujor, por gjërat nuk shkuan ashtu si gjirokastriti shpresonte. 34-vjeçari luajti vetëm 24 minuta në sfidën që APOEL Nikosia fitoi 1-0 në fushën e Nea Salamis, sepse u detyrua të zëvendësohej për shkak të dhembjeve. Pas vizitës mjekësore u konstatua se Haxhi ka ende probleme me tërheqjen që pësoi më 14 tetor në takimin e fundit eliminator të Botërorit 2010, ku Shqipëria humbi 4-1 në fushën e Suedisë. Lojtari do të jetë i detyruar të qëndrojë edhe 15 ditë të tjera jashtë garës. Kjo bën që mbrojtësi kuqezi të humbasë sfidën e fundjavës, ku APOEL-i pret në fushën e tij Anorthososin e Arjan Beqajt. Ai nuk do të jetë në fushë as në sfidën kundër Atletikos së Madridit, më datë 25, që do të luhet në Nikosia.

e. k.