Ankesat, ALBtelecom rrezikon 1 mln $ gjobë

ALBtelecom rrezikon të marrë një gjobë prej rreth 1 milionë dollarësh pas shumë ankesave që Ministria e Ekonomisë, Tregtisë dhe Energjitikës ka marrë nga shumë qytetarë.  Në një njoftim të METE thuhet se Ministria e Ekonomisë, Tregtisë dhe Energjitikës ka marë një numër të madh ankesash nga qytetarët shqiptarë, në adresë të ALBtelecom. Sipas tyre, kjo kompani ka mungesë transparence në mënyrën e faturimit të padetajuar të shërbimit të telefonisë fikse si dhe praktikën e mospërfshirjes së TVSH-së në çmimet e ofrimit të shërbimit internet.

Sipas METE, operatori ALBtelecom është përsëritës në praktikat e tij antiligjore në dëm të konsumatorëve shqiptarë, duke shkelur ligjin për mbrojtjen e konsumatorëve, pasi faaturat e paraqitura konsumatorit, duhet ti japin atij mundësinë për të verifikuar me përpikmëri llogaritjen e shitjes ose shërbimit të siguruar në një periudhë të caktuar.

Përpos telefonisë fikse, sipas METE,  abuzime ka dhe në shërbimin e ofruar për internetin.

Bazuar në këto të dhëna, METE kërkon nga Komisioni për Mbrojtjen e Konsumatorit, zbatimin me përpikmëri të ligjit, i cili në këtë rast parashikon një gjobë rreth 1 milionë dollarë për operatorin ALBtelecom- thuhet në deklaratën e METE-es.