Ashton: Në Tailandë duhet një pajtim mbarëkombëtar

Përplasjet e forta mes rebelëve dhe forcave të ushtrisë kanë shqetësuar edhe diplomacinë europiane. Shefja e diplomacisë evropiane Catherine Ashton ka pohuar se pajtimi kombëtar është tashmë një nevojë absolute në Tajlandë, dy ditë pas shpërndarjes së rebelëve "këmishëkuq".
"Dhuna nuk ka zgjidhur asgjë, vetëm e ka dëmtuar Tajlandën dhe popullin e saj duke i thelluar përçarjet në vend që ato të kapërcehen", u shpreh Përfaqësuesja e Lartë e Bashkimit Evropian për çështjet e Jashtme.
"Pajtimi kombëtar është tani një nevojë absolute. është e nevojshme të gjendet një konsensur mes palëve që synojnë ndërtimin e një shoqërie që i përfshin të gjitha pjesët e saj", shtoi ajo. Ashton u bëri thirrje tajlandezëve të rivendosin rendin publik duke respektuar plotësisht të drejtat e njeriut dhe liritë themelore". Ajo u kërkoi gjithashtu manifestuesve të dialogojnë me qeverinë "në mënyrë konstruktive, pa përdorur dhunën". Si mike e Tajlandës, BE-ja nuk mund të qëndrojë indiferente. Jam e gatshme të kontribuoj në procesin e arritjes së një konsensusi që synon pajtimin kombëtar", bëri të ditur ajo. Kryeministri tajlandez Abhisit Vejjajiva u shpreh sot se në Bangkok është rivendosur rendi. Por, ai pranoi gjithashtu se ndalimi i dhunës nuk i ka dhënë fund krizës politike me të cilën po përballet vendi që prej disa vitesh. Të paktën 85 persona janë vrarë dhe më tepër se 1 900 të tjerë janë plagosur që nga fillimi i manifestimeve në mes të marsit nga "këmishëkuqtë" për të siguruar dorëheqjen e tij dhe zgjedhje të parakohshme.