Assad shpall amnisti të pjesshme

Presidenti sirian Bashar al-Assad u dha amnisti të gjithë të dënuarve “që nuk janë dënuar për aksione terroriste” dhe që nuk kanë kryer krime ditët e fundit.

Lajmi njoftohet nga televizioni shtetëror sirian, por pa përcaktuar nëse nga kjo amnisti do të përfitojnë edhe qindra të arrestuar politikë dhe aktivistë të opozitës.

Bëhet fjalë për amnistinë e tretë të pjesshme të Assadit që nga nisja e luftës civile në vend. Por opozita akuzon se lëvizjet janë në favor të pushtetit dhe se nga amnistia po përfitojnë të dënuar për krime monstruoze, që më pas bëhen pjesë e makinerisë shtypëse të civilëve.

Në raportet ndërkombëtare thuhet se burgjet siriane janë të mbipopulluara që nga nisja e protestave popullore kundër presidentit Assad. Amnistitë e miratuara herë pas here, përveçse kanë lehtësuar koston e regjimit, janë shfrytëzuar edhe për rekrutimin e elementëve kriminalë.

Në anën tjetër se një predhë nga Siria e ka goditur një qendër shëndetësore në Turqi. Ende nuk ka njoftime për të lënduar. Mediat turke thonë se predha ka rënë në distriktin Reyhanli, në provincën turke Hatay. Zyra e guvernatorit të distriktit Reyhanli tha se deri më tani nuk ka asnjë informacion lidhur me këtë incident.