Australi, kryeministrja shpëton “paq” nga protestuesit

Një grup protestuesish të inatosur kanë bllokuar Kryeministren australiane Julia Gillard dhe liderin e opozitës Tony Abbott, të cilët kanë mundur të kalojnë vetëm falë truprojave dhe policisë.

Lajmin e bëjnë të ditur mediat lokale, sipas të cilave rreth 40 policë shoqëruan Gillard dhe Abbott nga një restorant i qytetit të Kanberrës, pasi ai u rrethua nga rreth 200 mbështetës të së ashtuquajturës Ambasada e Vendasve.

Ka qenë Abbott që fillimisht ka acaruar protestuesit, me një deklaratë se kishte ardhur koha që të mbyllnin kampin e tyre me cadra, që shënon plot 40 vjet nga ngritja.

Kampi në fjalë, i njohur ndryshe si ambasada prej tendash, u ngrit në vitin 1972 nga katër persona, në shenjë proteste ndaj refuzimit të kryeministrit të atëhershëm për të njohur të drejtat e banorëve indigjenë.

Dy politikanët ishin atje për të marrë pjesë në një ceremoni ku u nderuan me medalje personat që kishin ndihmuar komunitetet gjatë fatkeqësive natyrore, si zjarreve të vitit 2009 në Viktoria dhe përmbytjeve të viteve 2010 dhe 2011 në Kuinslend.