BE: Shqipërisë do i japim shansin e integrimit në qershor të vitit 2012

Zëvendëskryetari i grupit për Europën Juglindore në PE, Jelko Kacin thotë se Shqipëria po ofron rezultate konkrete përmes rinisjes së bashkëpunimit mazhorancë - opozitë, në funksion të përmbushjes së reformave dhe plotësimit të 12 rekomandimeve të Brukselit

Rivendosja e dialogut politik në Shqipëri është një sinjal pozitiv për Parlamentin Europian. Brukseli është i gatshëm t’i ofrojë Shqipërisë një mundësi për të kompensuar shpejt kohën e humbur, por kjo do të arrihet vetëm nëse klasa politike në Shqipëri ofron rezultate konkrete të bashkëpunimit për reformat europiane.
Këtë vë në pah edhe zëvendëskryetari i grupit për Europën Juglindore, Jelko Kacin.
“Përplasjet midis dy blloqeve kryesore politike në Shqipëri që e morën peng vendin për dy vjet, ishin kundra-produktive dhe nuk e ndihmuan aspak Shqipërinë. Liderët politikë duhet të jenë të kuptojnë, se përplasjet individuale dhe personale nuk e forcojnë kredibilitetin e tyre dhe dëmtojnë të ardhmen e Shqipërisë. Kur flasim për Shqipërinë, bëhet fjalë së pari për qytetarët e Shqipërisë, ndaj nevojitet më shumë prosperitet dhe konsolidim i dialogut politik”, u shpreh eurodeputeti Jelko Kacin.
Po në këtë linjë, Kacin shtoi se “flamuri shqiptar është kuq e zi, por politikisht jo gjithçka është kuq e zi në Shqipëri”. “Duhen më tepër ngjyra. Ne duam një ngjyrë të gjelbër apo të verdhë, pra një ylber ngjyrash politike. Unë kam vendosur që të marr pjesë takimin e ardhshëm me palën shqiptare pasi dua të mbështes ata që mendojnë për të ardhmen e Shqipërisë dhe jo të hakmerrem për të shkuarën”, tha ai.
Për Kacin kjo duket gati një mrekulli, por së bashku me shtete të tjera të rajonit, Shqipëria mund ta shohë veten më afër BE-së në qershor, nëse zbatohen 12 rekomandimet e KE-së. “Kjo do të ishte gati një mrekulli. Mrekullitë ndodhin hera herës. Shpresoj që këtë radhë, do të shfaqen në Shqipëri. Dua ta besoj këtë, por më duhet të pres deri sa të shoh provën e fundit. Është e rëndësishme që Mali i Zi do të fillojë negociatat e anëtarësimit në korrik. Pastaj është Maqedonia që ka ngecur për 6 vjet dhe shpresoj që ata të lëvizin vitin tjetër për të gjetur një kompromis. Unë jam raportuesi i Serbisë dhe i mbështes ata. Po bëj gjithçka mundem, por kjo është pak a shumë si një lojë futbolli. Unë mund të jem entuziast, mund të jem shumë në favor, por është ekipi serb që duhet të shënojë golin. Ata duhet të japim rezultate”, vlerësoi Kacin.
Qershori i vitit të ardhshëm mund të sjellë një avancim të konsiderueshëm për politikën e zgjerimit të BE dhe vendet aspirante. Në funksion të përshpejtimit të axhendës së integrimit, qeveria miratoi dy ditë më parë, strategjinë e Zhvillimit dhe Integrimit 2013 – 2020. Kryeministri kërkoi që në hartimin e Strategjisë të përfshihet edhe Plani i Veprimit për 12 rekomandimet e Bashkimit Europian, i rishqyrtuar nga Ministria e Integrimit së bashku me Komisionin Parlamentar të Integrimit, që kryesohet nga opozita dhe që ka tani mbështetjen e spektrit politik shqiptar. Strategjia 2013 – 2020 do të ketë si objektiva madhore: Shqipëria - vend i zhvilluar, Shqipëria - vend i integruar në BE.