BERLIN – Dobrindt: Refuzimi i azilkërkuesve në kufi tani është i mundur

BERLIN, 7 maj /ATSH-DPA/ – Ministri i ri i Brendshëm i Gjermanisë, Alexander Dobrindt, deklaroi se tani do të jetë e mundur të kthehen mbrapsht azilkërkuesit edhe në kufijtë e vendit.

Duke folur në Berlin, Dobrindt, i cili ka qenë në detyrë vetëm për disa orë që kur qeveria e re konservatore mori detyrën të martën, tha se ‘’do të anulonte udhëzimet verbale që datojnë që nga viti 2015 që i pengonin rojet kufitare gjermane të kthejnë mbrapsht njerëzit që kërkonin azil’’.

Konservatorët e Gjermanisë, përfshirë Unionin Kristian-Social (CSU) të Dobrindtit, i cili është i pranishëm vetëm në Bavari, kanë premtuar të kufizojnë imigracionin e parregullt duke rritur kontrollet dhe duke kthyer mbrapsht më shumë njerëz në kufijtë e vendit sapo të marrin detyrën.

Kritikët thonë se refuzimi i hyrjes për azilkërkuesit do të ishte një shkelje e ligjit gjerman dhe të BE-së dhe nuk mund të bëhet pa koordinim të ngushtë me fqinjët e Gjermanisë në BE.

Koalicioni i ri i Berlinit i përbërë nga Kristian-Demokratët, CSU-ja dhe Social-Demokratët është zotuar të ruajë kontrollet kufitare dhe të kthejë mbrapsht emigrantët e paligjshëm në kufi, edhe nëse ata kërkojnë azil./   /os/