BJELLORUSI – Lukashenko riorganizon qeverinë për të reduktuar burokracinë

MINSK, 27 qershor /ATSH-DPA/- Presidenti autoritar i Bjellorusisë, Aleksander Lukashenko ka ricaktuar postet kyçe brenda qeverisë dhe administratës presidenciale të vendit me synimin për të rritur efikasitetin, njoftoi sot agjencia shtetërore e lajmeve “BELTA”.

“Efikasiteti duhet të rritet në mënyrë të pabesueshme nëse duam t’i mbijetojmë kësaj lufte të çmendur”, tha Lukashenko.

Ai paralajmëroi kreun e ri të administratës presidenciale, ish-ambasadorin në Rusi, Dmitry Krutoi se ministrat duhet të vrapojnë dhe t’i kryejnë detyrat e tyre.

Lukashenko tha se riorganizimi kishte për qëllim reduktimin e burokracisë.

Ministri i ri i Jashtëm është Maxim Ryzhenkov.

“Ministria e Punëve të Jashtme duhet të riorganizohet rrënjësisht në mënyrë që të marrë masat e saj”, tha Lukashenko.

“Kushdo që nuk dëshiron të punojë duhet të shkarkohet”, shtoi ai.

Ryzhenkov, i cili ka drejtuar administratën presidenciale, zëvendëson Sergei Aleinik, i cili po kalon në parlament.

Aleinik ka qenë në detyrë që nga fundi i vitit 2022, pasi paraardhësi i tij, ministri i Jashtëm Vladimir Makei, vdiq papritur.

Krahas kreut të zyrës presidenciale, postin e nënkryetarit të administratës presidenciale po e zë Natalya Petkevich, të cilën Lukashenko e vlerësoi si këmbëngulëse.

Në qeveri, Lukashenko emëroi Yuri Shuleiko si zëvendëskryeministër, Aleksandr Yefimov si ministër të Industrisë dhe Anatoly Linevich si ministër për Bujqësinë, një sektor i rëndësishëm në Bjellorusi.

Bjellorusia është aleati më i ngushtë i Rusisë në konfliktin me Ukrainën dhe Perëndimin. Vendi është ekonomikisht i varur nga Moska për lëndët e para.

Ashtu si Rusia, Bjellorusia është gjithashtu subjekt i sanksioneve perëndimore për shkak të shkeljeve të të drejtave të njeriut dhe mbështetjes së luftës së Moskës në Ukrainë.//a.i/