BM – Starmer bisedë telefonike me Trump pas samitit SHBA-Rusi për armëpushimin në Ukrainë
LONDËR, 16 gusht /ATSH-DPA/- Kryeministri britanik Keir Starmer zhvilloi një bisedë telefonike me presidentin amerikan, Donald Trump pasi samiti SHBA-Rusi përfundoi pa një marrëveshje për të ndaluar luftën në Ukrainë.
“Starmer iu bashkua një telefonate me Trump dhe presidentin ukrainas Volodymyr Zelensky, si dhe udhëheqës të tjerë evropianë, pas bisedimeve SHBA-Rusi për armëpushim në Ukrainë”, tha zyra e Starmer.
Trump nuk siguroi një marrëveshje për t’i dhënë fund konfliktit në Ukrainë – pas gati tre orësh bisedimesh me homologun e tij rus, në një bazë ushtarake në Anchorage, Alaskë.
Pas negociatave, Trump tha se ishte bërë “një progres i madh” me “shumë pika” të rëna dakord.
Pas samitit, Trump sugjeroi se kishte vetëm disa pengesa të mëdha që pengonin perspektivën e një marrëveshjeje paqeje.
Duke folur për “Fox News”, ai tha se takonte Zelensky të “bënte një marrëveshje” për t’i dhënë fund luftës.
Në një telefonatë pas takimit Trump-Putin, Starmer dhe Zelensky biseduan me presidentin amerikan së bashku me udhëheqësit nga Italia, Franca, Finlanda, Gjermania dhe Polonia, si dhe me shefin e NATO-s, Mark Rutte dhe presidenten e Komisionit Evropian, Ursula von der Leyen.
Starmer pritet të bisedojë sot sërish me udhëheqësit evropianë.
Zelensky tha se telefonata filloi si një takim kokë më kokë midis tij dhe presidentit amerikan, përpara se udhëheqësit evropianë të NATO-s t’ju bashkoheshin.
Udhëheqësi ukrainas sugjeroi gjithashtu se do të udhëtonte në Uashington – në fillim të javës së ardhshme për të vazhduar bisedimet.
“Ne mbështesim propozimin e presidentit Trump për një takim tripalësh midis Ukrainës, SHBA-së dhe Rusisë. Ukraina thekson se çështjet kryesore mund të diskutohen në nivelin e udhëheqësve dhe një format tripalësh është i përshtatshëm për këtë”, tha Zelensky në X.
“Të hënën do të takohem me presidentin Trump në Uashington, për të diskutuar të gjitha detajet në lidhje me përfundimin e vrasjeve dhe luftës. Jam mirënjohës për ftesën”, tha ai.
“Aleatët evropianë duhet të jenë të përfshirë në çdo fazë – për të siguruar garanci të besueshme sigurie së bashku me Amerikën”, shtoi ai.
“Personeli britanik është gati të mbërrijë në Ukrainë – disa ditë pasi Moska dhe Kievi të bien dakord për pezullimin e luftimeve”, tha më herët Ministria e Mbrojtjes ndërsa Trump u takua me Putinin. //a.i/