BP, pavarësisht katastrofës do të vazhdojë me shpimet në det

Një alarm zjarri, që ishte vendosur në platformën e naftës së BP, në Gjirin e Meksikës, që ishte edhe zanafilla e katastrofës ekologjike ishte fikur. Kjo është dëshmia e fundit e shefit të elektricistëve. Sipas deklaratës së tij, të bërë publike për qeverinë amerikane, që po merret me hetimin e çështjes, alarmi, që mund të kishte detektuar sasinë e madhe të naftës, ishte shuar në mënyrë që të mos i shqetësonte natën njerëzit që flinin. Platforma e naftës, që kryente shpime në oqean, shpërtheu më 11 prillin e kaluar, duke shkaktuar një derdhje të jashtëzakonshme të arit të zi në oqean e duke shkaktuar një ndotje të jashtëzakonshme të deteve. Sipas disa spekulimeve, shefi ekzekutiv i kompanisë, Tony Hayward, do të japë dorëheqjen të martën e ardhshme, pas presioneve të vazhdueshme nga bordi drejtues i kompanisë, për t’u larguar si pasojë e menaxhimit të keq të situatës. Gjigandi britanik i naftës, që ka pësuar humbjen më të madhe në historinë e tij, që nga shpërthimi i prillit, do të publikojë po të martën rezultatet e saj për sa i përket humbjeve dhe ardhmërisë së kompanisë. Ndërkaq kompania dje ka njoftuar se do të nisë shpimet në nëndetin e Libisë brenda pak javësh, pas një marrëveshjeje të nënshkruar me vendin afrikanoverior në vitin 2007. Kjo, pavarësisht gjithë problemeve me mjedisin që shkaktoi shpërthimi i platformës në Gjirin e Meksikës dhe mbi të gjitha për akuzat për lirimin e një krimineli libian. Për BP ky ishte një rikthim në këtë vend pas një periudhe 30-vjeçare. Në Libi thellësia që do të përshkojë sonda në tokë është më e madhe se ajo në Gjirin e Meksikës. Sipas ekspertëve, nëse ka një mësim që duhet nxjerrë nga ajo që ndodhi në këtë vend, është ndalimi i shpimeve të tilla që janë shumë të rrezikshme dhe me pasoja katastrofike nëse shkojnë keq. Por duket se BP nuk ka vënë mend nga sa ndodhi në Gjirin e Meksikës, ndaj kërkon që të vazhdojë biznesin si zakonisht, edhe në zona të tjera të botës, sikur të mos kishte ndodhur gjë.