BQE do shkurtojë normat e interesit

Banka Qendrore Evropiane ka gjasa të mëdha të shkurtojë normën e interesit më vonë gjatë vitit, në përpjekje për të nxitur rritjen ekonomike në një kohë frikë për ekonominë e eurozonës.

Shkurtimi do të jetë i pari në 10 muaj dhe do të çojë normën e interesit në një rekord të ri uljeje.

Aktualisht normat janë në 0.75 për qind, por ka pasur kërkesa për shkurtime të tjera për shkak të rritjes së shqetësimeve për ekonominë dhe rënies së inflacionit.

Të dhënat zyrtare të publikuara të martën treguan rekordin maksimal të papunësisë në vendet e eurogrupit dhe inflacionin në rënie për të tretin vit rresht.

Kjo ka rritur parashikimet e zymta për ekonominë e eurozonës, ku shumë vende anëtare vazhdojnë të jenë në reçesion ose të vuajnë nga rritja e ulët.

Shumë ekonomistë kishin spekuluar prej kohësh për uljen e normave të interesit nga BQE, por të dhënat e publikuara këtë javë i bënë shkurtimet edhe më urgjente.

Shumica e ekonomistëve, të intervistuar nga agjencia e lajmeve Reuters, parashikojnë se normat do të reduktohen në 0.5 për qind.

Tregjet ka të ngjarë të reagojnë pozitivisht ndaj këtyre shkurtimeve, por nuk është e qartë se çfarë impakti ky veprim do të ketë në ekonominë reale.

Në muajt e fundit janë shtuar thirrjet që vendet evropiane të heqin dorë nga masat tradicionale anti-krizë, të cilat sipas kritikëve po pengojnë rritjen ekonomike.