BRUKSEL – BE: Të ndiqen përgjegjësit e sulmit në Banjskë
BRUKSEL, 24 shtator /ATSH-AA/ – Bashkimi Evropian (BE) ka përsëritur thirrjen që të ndiqen përgjegjësit e sulmit në Banjskë të Zveçanit në Kosovë.
Zëdhënësi i BE-së, Peter Stano ka thënë se BE-ja përsërit thirrjen që të ndiqen përgjegjësit e sulmit në Banjskë dhe se është e përkushtuar për drejtësi.
Në përvjetorin e parë të sulmit në Banjskë, Stano ka shkruar në rrjetet sociale se duhet të vijojnë përpjekjet për ruajtjen e sigurisë dhe normalizimin e raporteve mes Kosovës dhe Serbisë.
“Një vit pas sulmit në Banjskë, BE-ja përsërit thirrjen për ndjekje të shpejtë të përgjegjësve dhe rikonfirmon përkushtimin e saj për drejtësi dhe llogaridhënie. Është rikujtim i nevojës për përpjekje të vazhdueshme për të ruajtur sigurinë dhe avancimin e normalizimit të raporteve mes Kosovës dhe Serbisë”, ka shkruar Stano.
Stano ka shpërndarë postimin e përfaqësuesit të BE-së për Politikë të Jashtme dhe Siguri, Josep Borrell i cili shkroi se “dënoj në termat më të ashpër të mundshëm sulmin e shëmtuar nga një bandë e armatosur kundër policëve të Kosovës në Banjskë, në veri të Kosovës, ku mbeti një polic i vdekur e dy të tjerë të plagosur”.
Presidentja e Kosovës, Vjosa Osmani, në përvjetorin e rënies së rreshterit Afrim Bunjaku tha se Bunjaku ra dëshmor për të treguar se Kosova “është atdheu ynë i përjetshëm”.
“Sot një vit, Rreshteri Afrim Bunjaku ra dëshmor, për të treguar edhe një herë, siç kemi dëshmuar ndër shekuj, se kjo tokë është atdheu ynë i përjetshëm. Se liria nuk ka çmim. Se Kosova është dhe do të mbetet e pandashme, e liria dhe kufijtë tanë të paprekshëm!”, shkroi presidentja Osmani.
Mbrëmë, në një mbledhje të kabinetit qeveritar, Qeveria e Kosovës emërtoi rrugën rajonale Ballaban-Banjskë me emrin e Heroit të Republikës së Kosovës “Afrim Bunjaku”.
Në mëngjes, kryeministri Albin Kurti bashkë me kryetarin e Kuvendit të Kosovës, Glauk Konjufca, ministrin e Brendshëm, Xhelal Sveçla dhe ministra të tjerë dhe deputetë, vizituan familjen e rreshterit Afrim Bunjaku, ndërsa po ashtu vendosën kurora lulesh në varrin e tij.
Më 11 shtator, Prokuroria Speciale e Kosovës ngriti aktakuzë ndaj 45 personave në rastin e sulmit terrorist që ndodhi vitin e kaluar në Banjskë.
Ditën e nesërme, më 25 shtator, do të fillojë gjykimi i disa prej pjesëmarrësve të sulmit terrorist në Banjskë më 24 shtator 2023. /os/