BRUKSEL – BE: Vonesa e ndërprerjes së energjisë ruse nuk ka lidhje me bisedimet e paqes

BRUKSEL, 19 mars /ATSH-DPA/- Ndërsa Bashkimi Evropian ka vonuar dy herë planin për të hequr gradualisht importet e karburanteve fosile ruse, komisioneri i BE-së për Energjinë, Dan Jorgensen tha se kjo nuk kishte të bënte me bisedimet e paqes SHBA-Rusi për luftën në Ukrainë.

“Plani është shtyrë, por jo përpjekja”, u tha Jorgensen gazetarëve të European Newsroom (enr).

“Ne po punojmë çdo ditë për të hequr qafe naftën ruse, por kjo nuk është një çështje e pakomplikuar”, shtoi ai.

Propozimi për të hequr dorë nga importet e karburanteve fosile ruse, fillimisht ishte planifikuar të publikohej më 26 mars, por është shtyrë nga Komisioni Evropian pa një datë të re të specifikuar.

Jorgensen ishte zotuar të paraqiste udhërrëfyesin në 100 ditët e tij të para në detyrë, por ky afat tani ka përfunduar.

Masa ka nxitur spekulime se BE-ja është në ankth për të mos ndërprerë bisedimet e paqes SHBA-Rusi për Ukrainën, duke futur masa të reja që mund të shqetësojnë Kremlinin.

Pas pushtimit të plotë të Ukrainës nga Rusia, komisioni zbuloi një strategji të re për t’u bërë i pavarur nga importet ruse të karburanteve fosile deri në vitin 2030 dhe për t’i mohuar Kremlinit më shumë të ardhura për të vazhduar luftën.

Për ta bërë këtë, BE-ja planifikon të nxisë prodhimin e energjisë së rinovueshme, të përmirësojë ruajtjen e energjisë dhe të marrë importe të reja të karburanteve fosile nga Shtetet e Bashkuara të Amerikës, Norvegjia dhe të tjerët.

Vendet e BE-së tani kanë ndaluar importet e qymyrit dhe, me disa përjashtime, të naftës së papërpunuar nga Rusia dhe janë zotuar të reduktojnë importet e tjera të karburanteve fosile.

“Nëse heqja e importeve të karburanteve fosile ruse do të ishte e lehtë, ne do ta kishim bërë atë tre vjet më parë,” tha Jorgensen. //a.i/