Bankat nuk japin kredi, bizneset marrin fajde

Kriza ekonomike dhe shtrëngimi i kredidhënies nga ana e bankave i ka detyruar bizneset që të gjejnë burime alternative për të siguruar para për investime. Shumica e bizneseve kanë nisur të marrin para në formën e fajdeve, edhe pse ky treg është ilegal.
Kreditë
Kohët e fundit edhe Banka e Shqipërisë ka pranuar se shtrëngimi i kushteve për dhënien e kredive ka drejtuar bizneset drejt marrjes së fajdeve. Në raportin e vrojtimit të aktivitetit kreditues, Banka Qendrore sqaron se përveç shtrëngimit të kushteve për kreditimin, në gjashtë muajt e parë të këtij viti, edhe kërkesa e sipërmarrësve për kredi ka qenë e ulët.
Fajdet
Faktori kryesor, por që pranohet në masë nga shoqatat e bizneseve është marrja e parave në burime alternative. Informaliteti që karakterizon dhënien e fajdeve bën që shumë biznese të mos pranojnë ta pohojnë para mediave një gjë të tillë. Ekspertët e ekonomisë shpjegojnë se kjo është një situatë e pritshme, por e rrezikshme për ekonominë. Bizneset kërkojnë futjen në sistem të funksionimit të bursës, e cila do të eliminojë kërkesën e lartë për financim. Ata sqarojnë se në momentin që ndërmarrja gjendet në vështirësi mund të shesë një pjesë të aksioneve për tu rikuperuar.
Tkurrja
Standardet e kredisë u shtrënguan si për kreditë dhënë ndërmarrjeve të vogla dhe të mesme ashtu dhe për ato dhënë ndërmarrjeve të mëdha. Sipas qëllimit të përdorimit të kredisë, standardet u shtrënguan për ato kredi me qëllimin financimin e investimeve dhe të kapitalit qarkullues. Faktorët me kontributin kryesor në shtrëngimin e standardeve të kredisë për bizneset, ishin: problemet specifike të sektorit ku zhvillon aktivitetin ndërmarrja, gjendja e huave me probleme në sistemin bankar dhe situata makroekonomike në vend. Kushtet nëpërmjet të cilave bankat kanë zbatuar politikën shtrënguese të standardeve për kreditë dhënë bizneseve janë: rritja e kërkesës për kolateral, në raport me madhësinë e huas, zgjerimi i marzhit mesatar dhe atij për kreditë me rrezik. Për individët, politika shtrënguese është zbatuar nëpërmjet uljes së madhësisë së kredisë së akorduar dhe rritjes së kërkesës për kolateral.