Bardhi pas takimit me drejtorin e DASH: Shqipëria kërkon luftë reale ndaj krimit, nevojitet qeverisje e papërfshirë
Kryetari i Grupit Parlamentar të Partisë Demokratike, Gazment Bardhi, ka bërë publik takimin e tij me Drejtorin për Çështjet e Evropës Perëndimore dhe Qendrore në Departamentin Amerikan të Shtetit (DASH), z. Mark Fleming.
Përmes një postimi, Bardhi theksoi rolin e Shteteve të Bashkuara si një partner kyç për Shqipërinë dhe rrugën e saj europiane, por vuri theksin te nevojat imediate të vendit në kuadër të sigurisë dhe qeverisjes.
Bardhi theksoi se lufta kundër krimit të organizuar duhet të jetë prioritet për çdo vend anëtar të NATO-s, dhe bëri thirrje për një angazhim serioz në Shqipëri.
“Shqipëria ka nevojë për luftë reale ndaj krimit të organizuar,” shkruan Bardhi.
Ai shtoi se për të arritur këtë, vendit i nevojitet një ndryshim themelor në lidershipin politik dhe zbatimin e ligjit: “për këtë nevojitet një qeverisje e përgjegjshme, e pa lidhur me krimin e organizuar, si si dhe një drejtësi të pavarur dhe me integritet.”
Kryetari i Grupit Parlamentar ritheksoi se SHBA-ja ka qenë dhe mbetet një mbështetës thelbësor i Shqipërisë dhe perspektivës së saj evropiane.
/rtsh.al/