Basha: Qeveria Rama 3, përsëritje e mashtrimeve të vjetra!

Kreu i Partisë Demokratike, Lulzim Basha, reagoi pas deklaratave të kryeministrit Edi Rama në fjalimin e tij përmbyllës të mandatit të dytë qeverisës. Zoti Basha thotë se nuk kishte asgjë të re nga përsëritja e mashtrimeve të vjetra. “Asgjë e re nga përsëritja e mashtrimeve të vjetra. Plehrat digjen në kriza mjedisore të stisura për të çuar taksat e qytetarëve te mafia e inceneratorëve, krimi gëlon prej ortakërisë me pushtetin, korrupsioni që ka kapur shtetin është i përhapur në cdo qelizë të qeverisë, varfëron dhe largon shqiptarët, të braktisur edhe në kohë pandemie me numrin më të lartë të vdekjeve në raport me popullsinë në Europë dhe paketat më të vogla ekonomike në kontinent, integrimi në të cilin mbahet peng nga dështimet e njëpasnjëshme”.

Sipas kreut të opozitës, ky është bilanci real i një regjimi që masakron zgjedhjet vetëm për të vjedhur familjet shqiptare.”Ky është bilanci real i një regjimi që masakron zgjedhjet vetëm për të vjedhur familjet shqiptare. Autorët e tij duhet të ishin përpara drejtësisë për atë që u kanë bërë Shqipërisë dhe shqiptarëve në këto 8 vite, jo duke përrallosur për arritje imagjinare. Partia Demokratike është e angazhuar për të sjellë ato zgjidhje që masakra e 25 prillit u mohoi qytetarëve, sepse asgjë e mirë nuk mund të vijë nga një e keqe e vjetër që e ka bërë Shqipërinë të pajetueshme për fëmijët tanë” shkruan lideri demokrat.

Reagimi i zotit Basha erdhi pasi më herët kryeministri shqiptar Edi Rama, bëri të ditur se javën e ardhshme do të publikojë emrat e kabinetit të ri qeveritar me të cilin PS do të qeverisi gjatë mandatit të saj të tretë.