Bashkia asfalton provizorisht sheshin Skënderbej, lirohet qarkullimi

Bashkia e Tiranës ka asfaltuar provizorisht një segment në forme Lje në sheshin Skënderbej, për të lehtësuar trafikun nga devijimi i qarkullimit të automjeteve dhe për të shmangur rëndimin e tij kur të bllokohet qarkullimi në akse të tjera hyrëse, për shkak të punimeve.

Ne kemi asfaltuar pjesën para Pallatit të Kulturës dhe Muzeut Kombëtar për të siguruar vetëm gjashtë vija kalimi për të rritur shpejtësinë e qarkullimit, thotë Mihal Cico, drejtor i Projekteve në bashki. Në fazën e finale kur në shesh nuk do të lejohet më qarkullimi i automjeteve, ky asfalt do të shkatërrohet për ti hapur rrugë shtrimit të sheshit me pllaka. Sipas drejtorit të projekteve në bashki, një pjesë e sheshit Skënderbej do të shtrohet me pllaka guri të gdhendura, prodhim i vendit, ndërsa në zona të tjera do të ketë pllaka të ndryshme. Sipas projektit, sheshi Skënderbej do të shndërrohet në pedonal. Bashkia e Tiranës ka lënë të lirë qarkullimin e mjeteve, me drejtim lëvizjeje nga stacioni i trenit drejt sheshit "Skënderbej". Ndonëse tabela sinjalistike e vendosur nga bashkia ndalon lëvizjen e mjeteve në atë kah, qarkullimi është lejuar. Policia e shtetit, konfirmon se ndonëse herë pas here i është drejtuar me shkresë zyrtare Bashkisë së Tiranës për të ndryshuar skemën e lëvizjeve të mjeteve, ende nuk ka një përgjigje prej tyre dhe në këto kushte po vijon të respektojë grafikun e vendosur nga pushteti lokal, ndonëse kjo rëndon trafikun. Por projekti i ri për asfaltimin e qendrës së kryeqytetit ka qenë ditët e fundit edhe shkaku i bllokimit të trafikut të automjeteve. Si pasojë e bllokimit të disa kryqëzimeve në të cilat do të kryheshin edhe punimet Bashkia e Tiranës ka vendosur ndalimin e qarkullimit të automjeteve në disa korsi. Fillimi i punimeve për sheshin Skëndërbej do të shoqërohet me ridimensionim të trafikut në kryeqytet. Fillimisht Bashkia e Tiranës ka përgatitur pak kohë më parë një hartë të ndryshimit të qarkullimit rrugor, për çdo fazë punimesh, në mënyrë që të lehtësojë sa më shumë lëvizjen e makinave, që do të ndikohet prej bllokimit të sheshit. Sipas Bashkisë, momenti i parë i bllokimit ka qenë bllokimi i rrugës në sheshin para Pallatit të Kulturës dhe rrugët pas tij do të jenë akset që do të shfrytëzohen për kalimin e rrjedhës së trafikut.

Last Updated on Thursday, 13 May 2010 20:57