Berisha: 2012, viti i të vërtetave të pamanipuluara

Nga mbledhjet e qeverisë

Kryeministri Sali Berisha ka mbledhur dje në mbrëmje Komitetin Ndërministror për 100-vjetorin e pavarësisë. Duke vlerësuar punën e bërë deri tani, kreu i qeverisë tha se 2012-ta do të jetë viti i të vërtetave të pamanipuluara. Sipas tij, veprimtaritë për 100-vjetorin do të shtrihen në të gjithë vitin, pasi ky është një vit jubilar. Do të shënohen ngjarjet më të rëndësishme në historinë e kombit shqiptar, deri më 17 shkurt 2008. Po punohet për ta shndërruar këtë vit në vitin e të vërtetave të mëdha kombëtare, pasi shqiptarët më shumë se kurrë kanë nevojë për të vërtetat, larg manipulimit të historisë. Kombi ka më shumë nevojë për të vërtetat e pamanipuluara. Por, këto nuk janë çështje të politikës, janë çështje të historianëve dhe historianët e studiuesit duhet ti trajtojnë ato me objektivitet, të mos i shohin bardhezi. Ai foli gjithashtu për rishikimin e historisë, të cilën duhet ta bëjnë historianët dhe studiuesit me objektivitet.

Britania: Hiqni imunitetin e zyrtarëve

Ambasadorja e Mbretërisë së Bashkuar, Fiona Mcllwham

Ambasadorja e Britanisë në vendin tonë, Fiona McIlwham, tha dje se pas planit të veprimit, ngritjes së institucioneve dhe mjeteve kundër korrupsionit, vëmendja tani është e përqendruar te zbatimi dhe veprimi konkret: zbatimi i strategjisë antikorrupsion të qeverisë dhe veprimi për të hequr pengesat për hetimet… duke përfshirë imunitetin e gjyqtarëve, deputetëve dhe zyrtarëve. Në një tryezë të rrumbullakët të organizuar nga Transparency International për projektin e tyre Sistemi i kontrollit mbi alokimet e buxhetit, si pjese e Strategjisë Antikorrupsion, të financuar nga Këshilli Britanik dhe Banka Botërore, ambasadorja theksoi se progresi në luftën kundër korrupsionit nuk është jetik vetëm për progresin e Shqipërisë drejt BE-së, por edhe për fuqizimin e demokracisë. Ajo nënvizoi se keqpërdorimi i pushtetit i fondeve publike apo postit për përfitime personale, tjetërson sistemet demokratike.